ԱԺ նախագահ Ալեն Սիմոնյանի գլխավորած պատվիրակության այցը Մոսկվա, դեռ չսկսած, մեծ «իրարանցում» է առաջացրել մամուլում ու հենց խորհրդարանում։
Խնդիրը խոսակցություններն են պատվիրակության կազմի վերաբերյալ և թե ինչու՞ որևէ ընդդիմադիր պատգամավոր չի ընդգրկվել դրանում։
Asekose.am-ի հարցմանն ի պատասխան ԱԺ նախագահի մամուլի խոսնակ Ծովինար Խաչատրյանը նշեց, որ այդ հարցն անհարկի է շահարկվում։
«ՀՀ ԱԺ նախագահի գլխավորած պատվիրակության ՌԴ կատարելիք պաշտոնական այցի կազմի վերաբերյալ տեղեկացնեմ, որ պատվիրակության կազմում ընդդիմադիր պատգամավորների ներառված չլինելն անհարկի է շահարկվում: Խնդիրն այն է, որ այս և այլ այցերի վերաբերյալ առաջարկվել է «Հայաստան» և «Պատիվ ունեմ» դաշինքներին ներկայացնել պատվիրակության կազմում ընդգրկվելու անդամների թեկնածություն: Դաշինքների կողմից մշտապես ներկայացվել է այն պատգամավորների թեկնածությունները, որոնց ելքը երկրից իրավապահ մարմինների կողմից սահմանափակված է: Դաշինքները հրաժարվել են նրանց փոխարինել այլ պատգամավորներով»,-նշեց Ծովինար Խաչատրյանը:
Հավելենք, որ ՀՀ խորհրդանական պատվիրակության այցը Մոսկվա նախատեսված է հոկտեմբերի 3-ին։
