Հայաստանում այս տարվա առաջին կիսամյակում բանակում 31 մահ է արձանագրվել, որից միայն 2-ն է հակառակորդի կողմից արձակված կրակոցի արդյունքում:
Այսօր` սեպտեմբերի 13-ին, լրագրողների հետ հանդիպմանը ՀՀ ՊՆ խոսնակ Արծրուն Հովհաննիսյանը ցավով նշեց, որ հակառակորդի կողմից ակտիվ մարտական գործողությունների իրականացման բացակայության պայմաններում միշտ այդպիսի իրավիճակ է լինելու. «Մենք ուզում ենք, որ հակառակորդի կողմից արձակված կրակի արդյունքում ավելի շատ մարդ զոհվի, քան` այլ բաների՞ց: Մենք էլ ենք ուզում, որ ընդհանրապես մարդ չզոհվի: Բայց այդպես չի լինում: 70 հազար մարդ ամեն օր վեր է կենում, նստում է իր տանկը, մեքենան, իր գործն է անում, որը շատ վտանգավոր է: Մարդիկ գործ ունեն զենքի հետ: ԶՈւ-ում ամեն օր բոլորն ամեն ինչ անում են, որ մեկ հոգու մատն էլ չտրորվի: Բայց պետք է հասկանալ, որ մի քանի տասնյակ հազար մարդ մի քանի տասնյակ հազար մարտական, ուսումնական տրանսպորտային միջոց է շահագործում, շահագործում է նաև տարբեր տեսակի զինատեսակներ: Այս պարագայում, ցավոք, հնարավոր չէ զոհ չունենալ: Մարդիկ օր ու գիշեր աշխատում են, որպեսզի նման դեպքեր չլինեն, բայց դա անհնար է: Ամեն մի կորստից հետո լուրջ պատիժներ են լինում, հետևություններ են արվում»:
Ինչ վերաբերում է իրավապաշտպան կառույցների քննադատություններին, Հովհաննիսյանը ցավով նշեց, որ դրանց մեծ մասը զբաղվում են այլ բանով, ոչ թե առողջ վերլուծություններով.
«Այլ շահեր են հետապնդում, այլ գնահատականներ են տալիս, որպեսզի հասարակության մոտ այլ տպավորություն լինի: Թող գոնե մեկ օրինակ բերեն, երբ պետությունը կիսապատերազմական վիճակում է գտնվում, այն իրավիճակն է, որում հիմա Հայաստանն է, ու որևէ զոհ չկա: Ես չեմ արդարացնում, որովհետև զոհերի համար ընտանիքի անդամներից հետո ամենալուրջ սթրեսը ունենում են զինվորականները, հրամանատարությունը: Նրանք են ընտանիքի անդամներից հետո ամենաշատը տուժում: Իսկ սրբի դեմքով այդ կազմակերպությունների արտահայտությունները, թե բոլորը հանցագործներ են, իբր որևէ բան չի փոխվել, արդարացի չեն»:
