Ստամբուլում 58-ամյա գործարար Վեդաթ Յոնգելի սպանության գործի շրջանակներում ձերբակալվել է ՀՀ երկու քաղաքացի: Ձերբակալվածներ Արմեն Ա.-ն և Նարիկ Ա.-ն կասկածվում են Յոնգելի սպանության կասկածյալներ Ստելա Մ.-ի ու նրա որդի Վառլամ Մ.-ին օգնելու մեջ: Վերջիններս փախուստի են դիմել Թուրքիայից:
Ըստ թուրքական «Հյուրրիյեթ» պարբերականի՝ սպանության համար կասկածվողները նույնպես ՀՀ քաղաքացիներ են: Նրանք դեպքից երկու օր անց Ստամբուլի Աթաթուրքի անվան միջազգային օդանավակայանից մեկնել են Վրաստանի մայրաքաղաք Թբիլիսի, որտեղից էլ անցել են Հայաստանի տարածք:
Նշվում է, որ հարցաքննությունից պարզ է դարձել, որ կասկածյալները սպանության համար օգտագործված զենքը նետել են ծովը:
Ավելի վաղ նշվել էր, որ փետրվարի 16-ին առևտրով զբաղվող 58-ամյա Վեդաթ Յոնգելը Ստամբուլի Քյաղըթհանեի շրջանում գտնվող տանից 10.000 դոլար էր վերցրել և հեռացել: Որոշ ժամանակ անց հորից լուր չունենալու պատճառով Վեդաթի որդիները` Սերդար և Սեդաթ Յոնգելները դիմել էին ոստիկանություն:
Ոստիկանական աշխատանքների ընթացքում ՀՀ քաղաքացի Վարլամ Մ.-ն WhatsApp մեսենջերի միջոցով անձամբ գրել է գործարարի որդուն ու հայտնել Յոնգելի գտնվելու վայրը: Տրամադրված հասցեով մեկնած իրավապահները գործարարին գտել են մահացած՝ հրազենային վնասվածքների հետքերով:
