Նիկոլ Փաշինյանն ասաց, որ նախկին պատգամավոր Հայկ Սարգսյանի հայտարարությունների առիթով քրգործ է հարուցված. «Մեր իրավապահ համակարգում լավ կլինի, որ սենց կուլտուրա լինի, որ էդպիսի հայտարարությունների արդյունքում ինչ-որ մեկը հայտնվի բանտում. ո՞վ՝ ով մեղավոր է: Ինձ շա՜տ երկար հարաբերությունների պատմություն է կապում պարոն Սարգսյանի հետ, բայց պետք է ասեմ, որ այդ դիրքավորումը քաղաքականության մեջ իմ տեսած ամենաանազնիվ դրսևորումներից մեկն է: ՔՊ-ում նրա հետ հարաբերությունները լարվել են նրա պատճառով, որ իր հետ կապված եղել են բացահայտումներ, որոնք դատավճիռներով են հաստատված, քրգործեր կան հարուցված՝, լարվել է նրանից, որ ավազի հանքերի ապօրինի շահագործման թեմա է բարձրացվել, պարզվել է՝ կամ ինքը, կամ իր հետ փոխկապակցված անձինք ներգրավված են այդպիսի գործունության մեջ...»,- ասաց վարչապետը: Նա խոսեց նաև այլ բացահայտումների մասին:

***

«Նրանով իրավապահները զբաղվում են, եթե չեն զբաղվում, պետք ա զբաղվեն»,- լրագրողների հետ զրույցում ասաց ԱԽ քարտուղար Ալեն Սիմոնյանը՝ խոսելով ԱԺ նախկին պատգամավոր Հայկ Սարգսյանի մասին։
«Ես երբևէ որևէ օրենսդրական նախաձեռնության հետ կապված 9-րդ գումարման ԱԺ-ում որևէ քննարկում չեմ ունեցել, որևէ քննարկման չեմ մասնակցել, որևէ կարծիք չեմ հայտնել, որևէ մեկի հետ բովանդակություն չեմ քննարկել, որևէ ձևով չեմ խոսել, կարդացել, այլ կերպ քվեարկել։ Այն ամենն, ինչ ինքն ասում է, դրանով պարտավոր են զբաղվել իրավապահները»,- հավելեց Սիմոնյանը։
«Ճի՞շտ են ասում, որ երբ ԱԺ նախագահ էիք, ձեր գրության հիման վրա քննչական մարմինը ստուգումներ է անցկացրել White Shorja-ում (պատկանում է Հայկ Սարգսյանի ընտանիքին՝ խմբ․) և տուգանել»,- հետաքրքրվեց լրագրողը։ «Այո, ճիշտ է, որովհետև իմ մոտ հարց է առաջացել՝ մարդը, ով սուրբ է ձևանում, այդքան լա՞վն է, ինչպես ինքը ներկայանում է։ Նաև ասեմ, որ վստահ եմ՝ ՀՀ-ն շատ փոքր է, Երևան քաղաքը շատ փոքր է, ու բոլորը շատ լավ գիտեն, թե ինչերի մեջ է այդ անձնավորությունը»,- ի պատասխան ասաց Սիմոնյանը։
Լրագրողի դիտարկմանը, թե չի ստացվո՞ւմ, որ դուք ձեր դիրքը չարաշահել եք՝ անձնական խնդիրները լուծելու համար, ԱԽ քարտուղարը հակադարձեց․ «Ո՛չ, ես ընդամենը հարցում եմ արել՝ արդյո՞ք այդ կազմակերպությունը գործում է օրենքին համապատասխան»։

Նշենք, որ Հայկ Սարգսյանը «Tete A Tete» հաղորդման ժամանակ սկանդալային հայտարարություններ է արել Ալեն Սիմոնյանի վերաբերյալ։