TRIPP-ի շրջանակում որտեղով են անցնելու գազամուղն ու նավթամուղը․ Միրզոյանի մեկնաբանությունը
«Մի քիչ չեմ պատկերացնում նավթամուղ կամ գազամուղ, օրինակ, Մեղրիի երկաթուղու երկայնքով, էդտեղ շատ քիչ տարածք կա։ Կա գետ, մի փոքր շերտ և ժայռեր, այդտեղով կարող է անցնել և ամենահարմարն է երկաթուղին․․․»,- ԱԺ Արտաքին հարաբերությունների հանձնաժողովի նիստում ասաց ՀՀ ԱԳՄԱ նախարար Արարատ Միրզոյանը։
Նշենք, որ ԱԺ-ում մեկնարկել է «ՀՀ և ԱՄՆ միջև Թրամփի ուղի հանուն միջազգային խաղաղության և բարգավաճման վերաբերյալ ռազմավարական համագործակցության» շրջանակային համաձայնագիրը վավերացնելու գործընթացը։ Հանձնաժողովում համաձայնագիրը ներկայացնում է նախարար Միրզոյանը։
«Չեմ բացառում՝ իրավիճակ լինի, ուղևոր լինի, ամեն ինչ փայլուն է զարգացել, խաղաղությունն օրեցօր ամրապնդվել է։ Հասկանալի՞ է չէ, որ ինչ-որ պահ կգա ապագայում, որ կլինեն ուղևորափոխադրումներ, կլինեն այցեր, կլինի իրավիճակ, որ էդ երկաթուղով եկած մարդը կուզենա կանգառում իջնել, սուրճ խմել, որևէ բան ուտել, ուղղակի հանգստանալ կամ փոխել երկաթուղին»,- պնդեց ԱԳՄԱ նախարարը։
Դիտեք նաև՝
«Որևէ ենթակառուցվածք, որ գործելու է, որևէ հարաբերություն, որ հաստատվելու է ամբողջությամբ և դետալներով, տեղի է ունենալու մի քանի հիմնարար սկզբունքների հիման վրա կամ դրանց շրջանակներում․ դրանք են՝ ինքնիշխանություն, տարածքային ամբողջականություն, իրավազորություն»,- ԱԺ-ում
«Հայաստանի Հանրապետության և Ամերիկայի Միացյալ Նահանգների միջև «Թրամփի ուղի՝ հանուն միջազգային խաղաղության և բարգավաճման» նախագծի (ԹՐԻՓՓ) վերաբերյալ ռազմավարական համագործակցության մասին շրջանակային համաձայնագիրը վավերացնելու մասին» նախագծի ներկայացման ժամանակ նշել է նախարար Արարատ Միրզոյանը։ «Ինչպես նախորդ փաստաթղթի դեպքում, որպեսզի շահարկումներ չլինի ինքնիշխանություն բառի հետ կապված, նախօրոք հաշվել ենք՝ այս փաստաթղթում ինքնիշխանություն բառը՝ ենթակառուցվածքների մասով, օգտագործվում է 8 անգամ, հետևյալ համատեքստում․ հաստատվում է ՀՀ ինքիշխանությունը ենթակառուցվածքների և գործընթացների նկատմամբ։ ՀՀ-ն պահպանում է լիակատար ինքնիշխանություն և իրավազորություն իր սահմանների և մաքսային գործառնությունների նկատմամբ, պարտավորվում է ապահովել սահմանների արդյունավետ կառավարում և ունի սահմանային հսկողության բոլոր կետերում ֆիզիկական ներկայություն պահպանելու իրավունք»,- շարունակել է Միրզոյանը։
***
«Երբ խոսում ենք ԹՐԻՓՓ-ի մասին, դրա երկարությունը գիտենք, լայնությունն ինչքա՞ն է, ի՞նչ տարածքի մասին ենք խոսում»,- ԱԺ-ում ԹՐԻՓՓ նախագծի քննարկման ժամանակ ԱԺ «Հայաստան» խմբակցության պատգամավոր Քրիստինե Վարդանյանը հարց ուղղեց նախարար Արարատ Միրզոյանին։
«Չեմ կարող պատասխանել այդ հարցին, որովհետև չկա այդպիսի բան, որովհետև մի ենթակառուցվածքը ենթադրենք գազամուղը կարող է՝ անցում է Ղազախ-Իջևան, երկաթուղին՝ Մեղրիով, այլ բաներ էլ կարող են լինել, հիմա լայնությունը ինչքա՞ն է»,- պատասխանել է նախարարը։
ԱԺ հանձնաժողովում ԹՐԻՓՓ նախագծի քննարկման ժամանակ «Ուժեղ Հայաստան» խմբակցության պատգամավոր Մարիաննա Ղահրամանյանը հետաքրքրվեց նախարար Արարատ Միրզոյանից, թե արդյոք նախատեսվում է ՀՀ օրենսդրության մեջ որևէ փոփոխություն։
«Եթե դուք կարդացած լինեիք փաստաթուղթը, այնտեղ գրված է, որ կարող են լինել համաձայնագրից բխող օրենսդրական փոփոխություններ։ Ավելին, այդ փոփոխությունների նախագիծը հրապարակված է և դուք, որպես ԱԺ պատգամավոր, կարող էիք նայել և տեսնել՝ սրտներովդ ա, թե չէ, արդյոք ՀՀ համար վտանգավոր և մտահոգիչ փոփոխություններ են դրանք, թե տեխնիկական են»,- պատասխանեց Միրզոյանը։
«Ձեր կառավարության՝ մեր երկրի գլխին բերած աղետալի եռապատերազմից, Արցախի հայաթափումից հետո ուրիշ սահմռկեցուցիչ բան դժվար է պատկերացնել, մեկ էլ կարող է լինել, եթե այդ նույնը, Աստված մի արասցե, բերեք ՀՀ գլխին»,- արձագանքեց Մարիաննա Ղահրամանյանը։
«Մեր առաջին շփումն է, շատ բարեկամական եմ տրամադրված, սակայն մի փորձեք լինել ավելի դաշնակ և քոչարյանական, դա ձեր մոտ շատ վատ է ստացվում»,- ասաց Միրզոյանը:
***
«ԹՐԻՓՓ-ը Երասխով անցնող ճանապա՞րհն էլ է, թե՞ ոչ։ Եթե այո, նույն ռեժիմը, որը գործում է Հայաստանով անցնող ճանապարհների վրա՝ «Բեք օֆիս» և «Ֆրոնտ օֆիս», Երասխով անցնող ճանապարհի վրա նույնական գործո՞ւմ է»,- ԱԺ-ում «Հայաստանի Հանրապետության և Ամերիկայի Միացյալ Նահանգների միջև «Թրամփի ուղի՝ հանուն միջազգային խաղաղության և բարգավաճման» նախագծի (ԹՐԻՓՓ) վերաբերյալ ռազմավարական համագործակցության մասին շրջանակային համաձայնագիրը վավերացնելու մասին» նախագծի քննարկման ժամանակ ԱԺ «Հայաստան» խմբակցության պատգամավոր Քրիստինե Վարդանյանը հարց ուղղեց նախարար Արարատ Միրզոյանին։
«Ադրբեջանն իրավունք է ստանալու անցնել ՀՀ տարածքով Նախիջևան և կապելու է Ադրբեջանը մեր տարածքով 3-րդ երկրների հետ, և ՀՀ-ն ստանալու է փոխադարձ առավելություններ, օգտագործելու Ադրբեջանի տարածքը, երկաթուղով կապվելու Երասխից Մեղրի և 3-րդ երկրների հետ»,- նշեց նախարարը։
***
«Խաղաղության պայմանագիրը չի ստորագրվել, դուք ԹՐԻՓՓ-ը բերում եք վավերացման, սա չի՞ նշանակում, որ Հայաստանը ևս մեկ առանցքային հարցում Ադրբեջանի պահանջն է կատարում, ինչպես Սահմանադրության փոփոխությունը, Տիգրանաշենի հարցը»,- ԱԺ-ում ԹՐԻՓՓ նախագծի քննարկման ժամանակ «Ուժեղ Հայաստան» խմբակցության պատգամավոր Լենա Մաթևոսյանը հարց ուղղեց նախարար Արարատ Միրզոյանին։
«Այո, Ադրբեջանն ասում է՝ ես նախաստորագրել եմ խաղաղության համաձայնագիրը, բայց պատրաստ չեմ այն ստորագրել, քանի դեռ ձեր Սահմանադրությունն այսպիսին է։ Մենք ասում ենք՝ մեր Սահմանադրության մեջ ոչ մի մտահոգիչ բան չկա, այն, ինչ դուք մտածում եք, որ մտահոգիչ է, այդ մտահոգությունները փարատելու ամենակարճ ճանապարհը հենց նախաստորագրած համաձայնագիրը ստորագրել և վավերացնելն է, որովհետև այդ պայմանագրում բոլոր հարցերի պատասխանը տրվում է»,- պատասխանեց Միրզոյանը։
«Մենք այս հարցում չենք կիսում Ադրբեջանի մոտեցումը, Ադրբեջանն էլ ասում է՝ շատ լավ, մենք էլ ձեր մոտեցումները չենք կիսում։ Հայաստանի ու Ադրբեջանի կողմից ՀՀ Սահմանադրության մասով հիմա ոչինչ չի բանակցվում, ուրիշ բան, որ հրապարակային իրենց մտքում կա այդ հարցը։ ՀՀ-ն ասել է, որ մենք պատրաստ ենք օր առաջ սկսել խորհրդակցություններ՝ որոշելու ստորագրման տեղն ու ժամը, այս մոտեցումը հիմա էլ է կիրառելի, մենք պատրաստ ենք ստորագրել, իսկ իրենք այլ կոնտեքստում են տեսնում»,- հավելեց նախարարը։
***
«Ճանապարհների բացմանը, բնականաբար, ՀՀ որևէ քաղաքացի և հայ չի կարող դեմ լինել, ինչը ՀՀ բարեկեցությանն է վերաբերում, բայց մենք ուզում ենք, որ բոլոր ռիսկերը և ապագան հաշվարկված լինեն։ Մենք ձեզնից ակնկալում ենք դետալացված պատասխաններ, որպեսզի անհանգստություն չունենանք մեր՝ գնալով փոքրացող պետության և հայրենիքի ապագայի հետ կապված»,- ԱԺ-ում ԹՐԻՓՓ նախագծի քննարկման ժամանակ «Հայաստան» խմբակցության պատգամավոր Լիլիթ Գալստյանը դիմեց նախարար Արարատ Միրզոյանին։ «Ի՞նչ է նշանակում «մեր՝ գնալով փոքրացող հայրենիք»։ Ես չգիտեմ՝ ձեր հայրենիքը որն է, որ փոքրացել է։ Հայաստանի Հանրապետությունը 29 743 քառ․ կմ է՝ ճանաչված աշխարհի մնացած պետությունների կողմից, և ամբողջական վերահսկողությունը այդ մակերեսի նկատմամբ ՀՀ-ն պետք է վերահաստատի։ Այո, այնտեղ կտոր կա, որ գտնվում է ոչ մեր վերահսկողության տակ, այստեղ էլ կտոր կա, և մեր մոտեցումն այն է, որ սահմանազատման ճանապարհով Սովետական միության փլուզման պահին եղած սահմանները վերականգնելով էլ ավելի նպաստենք խաղաղության գործընթացին։ Մոտեցումներ կան նաև անկլավների հարցի լուծման հետ կապված»,- պատասխանեց Միրզոյանը։
«Օգոստոսի 8-ին ԱՄՆ նախագահի ներկայությամբ արված երկկողմ հայտարարությամբ Ադրբեջանին տրվում է անխոչընդոտ անցում, Հայաստանը ստանում է փոխադարձ առավելություն։ Ուզում եմ հասկանալ՝ որո՞նք են այն խոչընդոտները, որոնցից Ադրբեջանը զուրկ է լինելու, արդյոք այդ խոչընդոտը հայ սահմանապահը կամ մաքսավորը չեն, և դրա պատճառով ի հայտ է եկել «Բեք օֆիս» և «Ֆրոնտ օֆիս» հասկացությունը»,- ԱԺ-ում ԹՐԻՓՓ նախագծի քննարկման ժամանակ «Հայաստան» խմբակցության պատգամավոր Արթուր Խաչատրյանը հարց ուղղեց նախարար Արարատ Միրզոյանին։ «Ապաշրջափակվում է մի բան, որը ՀՀ պատմության մեջ ըստ էության չի եղել։ Սա քաղաքական մեծ նշանակություն ունի և սա ոչ միայն տրանսպորտային նախագիծ է, այլև ՀՀ-ի համար բացում է տնտեսական մեծ հնարավորություններ և կոչված է ամրապնդել խաղաղությունը։ Սա փոխկախվածության մեջ է դնում Հայաստանն ու Ադրբեջանը, ինչը ևս մեկ քայլով ամրապնդում է խաղաղությունը»,- պատասխանեց Միրզոյանը։
«Ոչ անհրաժեշտ մակարդակի, ոչ անհրաժեշտ հարգալիցությամբ եք ձևակերպել ձեր խոսքն ԱԺ-ում, առաջարկս է հետայսու այլ բան անել», «ես ձեզ հետ գործընկերաբար կխոսեմ»,- ԱԺ միջանցում Արտաքին գործերի և միջազգային առևտրի նախարար Արարատ Միրզոյանը և «Հայաստան» խմբակցության պատգամավոր Մեսրոպ Մանուկյանը հարցեր էին պարզում։
Նշենք, որ Մեսրոպ Մանուկյանն ԱԺ-ում ասել էր, որ «Արարատ Միրզոյանը ժամանկին խոսում էր իր սեփական ֆինանսական դժվարությունների մասին, իսկ այսօր մի քանի միլիոնանոց բաճկոնով է ման գալիս»։
***
«Դուք այդ դիրքում չեք, որ КВН-ի վերածեք, հեգնեք, դուք ինչ հեգնել եք, ինչ հումոր արել եք՝ վերջում վատ է դուրս եկել»,- ԱԺ-ում դիմելով նախարար Արարատ Միրզոյանին՝ ասաց ընդդիմադիր պատգամավոր Քրիստինե Վարդանայանը։ «Երբ 44-օրյա պատերազմից առաջ ասում էիք՝ մենք մեր բաժին Կարսը չենք հանձնելու՝ Արցախը նկատի ունենալով, հետո դրա հետ ի՞նչ եղավ։ Կամ ԱԳՆ բարձրաստիճան պաշտոնյան որ գնացել, նկար էր հրապարակում, ասում էր՝ նայեք, եկել ենք տարածքները հանձնելու, հետո տարածքները հանձնվեցին։ Ես խորհուրդ կտամ այս ոճը փոխել»,- շարունակեց պատգամավորը։
***
TRIPP-ի պայմանագրի նախագիծը հավանության արժանացավ ՀՀ ԱԺ արտաքին հարաբերությունների հանձնաժողովի կողմից
Արտգործնախարարի ներկայացրած փաստաթղթին կողմ է քվեարկել հանձնաժողովի 4 ՔՊ-ական անդամ, «Ուժեղ Հայաստանի» ներկայացուցիչը՝ դեմ, իսկ «Հայաստանը» չի մասնակցել քվեարկությանը:
Փաստաթուղթը կքննարկվի խորհրդարանի առաջիկա հերթական նստաշրջանում: