Հայաստանի Ազգային ֆիլհարմոնիկ նվագախումբը (գեղարվեստական ղեկավար և գլխավոր դիրիժոր` Էդուարդ Թոփչյան) վաղը՝ ապրիլի 3-ին, «Հիշում եմ և պահանջում» խորագրի ներքո կներկայացնի համերգ` հայազգի հայտնի դիրիժոր Ալան Ալթինօղլուի ղեկավարությամբ: Որպես հրավիրյալ մենակատար հանդես կգա միջազգային լայն ճանաչում ունեցող թավջութակահար Ալեքսանդր Չաուշյանը, ում կատարմամբ էլ կհնչի Սեն-Սանսի Թավջութակի կոնցերտը:
Ալան Ալթինօղլուն Երևանում հանդես կգա առաջին անգամ: Կներկայացվեն Վագներ և Ռավել (Վագների «Լոհենգրին» օպերայի 1-ին և 3-րդ գործողությունների նախանվագները, Ռավելի Իսպանական ռապսոդիան և «Դափնիս և Քլոյե» թիվ 2 սյուիտը):
ՀԱՖՆ-ի գեղարվեստական ղեկավար և գլխավոր դիրիժոր Էդուարդ Թոփչյանը ներկայացնելով հյուրին՝ նկատում է.նա վարժ խոսում է հայերեն, ավելին, երբ զանգահարել է իրեն՝ ապշել է նրա՝ վարժ հայերեն խոսքը լսելիս. «Ասաց՝ բարև, ես Ալան Ալթինօղլուն եմ: Ապշել էի»,-ասաց Թոփչյանը՝ նշելով, որ երբ իրեն հարցրել են, թե արդյոք գիտի՞ Ալան Ալթինօղլուին` ասել է, ոչ:
«Հետո փնտրեցի նրա անունը և առաջինը, որ տեսա` բավական երկար ու հարուստ կենսագրությունն էր` չնայած երիտասարդ տարիքին: Նա լավ գիտի իր գործը, և ես ուրախ եմ, որ մենք ունենք անուններ, ինչպիսիք են Սերգեյ Խաչատրյանն ու Ալան Ալթինօղլուն»:
Անդրադառնալով հարցին, թե ինչո՞ւ Ալթինօղլու, Ալանը պատասխանեց. «Ազգանվանս ոչ հայեցի լինելն իր պատմությունն ունի: Մեր ազգանունը Ալթունյան է, և, քանի որ թուրքերը պարտադրել են հայերին՝ փոխել իր ազգանունները, մենք էլ ստիպված ենք եղել Ալթունյանը փոխել Ալթինօղլուի: Սա ոչինչ չի նշանակում` ես գիտեմ, որ ես հայ եմ, ես սրտով հայ եմ»:
Իբրև սիմֆոնիկ դիրիժոր Ալան Ալթինօղլուն ղեկավարել է Գոթենբուրգի սիմֆոնիկ և Ցյուրիխի Տոնհալլե նվագախմբերը, իսկ ապրիլին նա ղեկավարելու է Մոցարտի Ռեքվիեմը` Մեծ Եղեռնի 100-ամյակին նվիրված համերգում:
Ֆրանսիայում ապրիլի 21-ին կայանալիք համերգին հրավիրված է մոտ 70 հայազգի երաժիշտ՝ տարբեր երկրներից:
Մանրամասները՝ տեսանյութում
Անի Կարապետյան