5 տարի ժամկետով ազատազրկված դերասան Վարդան Պետրոսյանը շուտով ազատության մեջ կլինի։
Asekose.am-ի հետ զրույցում Վարդան Պետրոսյանի փաստաբան Նիկոլայ Բաղդասարյանն ընդգծեց, որ անկախ այն հանգամանքից կլինի համաներման ակտ, թե ոչ, Վարդան Պետրոսյանը շուտով ազատ կարձակվի:
«Եթե համաներման ակտ չկիրառվի, վերաքննիչ բողոքի քննությունից հետո, կկիրառվի բաց ռեժիմ, Վարդան Պետրոսյանը նորից ազատության մեջ կլինի, քանի որ նա արդեն կրել է իր պատժի 1/3-ը»,-ասաց Նիկոլայ Բաղդասարյանը։
Asekose.am-ի հարցին, թե վճռաբեկ բողոքի ներկայացումը տուժող և մեղադրող կողմերից որքանով է հավանական, Բաղդասարյանը պատասխանեց, որ վերաքննիչից հետո շատ հնարավոր է, որ նրանք վճռաբեկ դատարան էլ դիմեն, ինչը մի փոքր էլ կհետաձգի Վարդան Պետրոսյանի ազատ արձակումը, բայց անկախ այս հանգամանքներից փաստաբանը ևս մեկ անգամ նշեց, որ վերջնական դատական ակտից հետո սիրված դերասանը շուտով ազատության մեջ է լինելու:
Նիկոլայ Բաղդասարյանի խոսքով` հիմա Վարդան Պետրոսյանն ունի նորմալ տրամադրություն, սպասում է վերաքննիչ դատարանի նիստին:
«Չնայած որ Վարդան Պետրոսյանի տրամադրությունը վատ չէ` նա ունի առողջական խնդիրներ, այդ առումով իրեն այնքան էլ լավ չի զգում և երբ արդեն ազատ արձակվի անպայման բուժման և ապաքինման կարիք ունի»,-եզրափակեց դերասանի փաստաբանը:
Հիշեցնենք, որ Հայաստանի Հանրապետության Կոտայքի մարզի ընդհանուր իրավասության դատարանը 2015թ. հունվարի 29-ին մեղավոր ճանաչեց Վարդան Պետրոսյանին՝ նրան դատապարտելով 5 տարի ժամկետով ազատազրկման: Առաջին ատյանի դատարանի կայացրած վճիռը բողոքարկել են տուժող կողմը և դատախազը:
Դերասանի գործով վերաքննիչ բողոքի քննությունը Վերաքննիչ քրեական դատարանում նշանակվել է ապրիլի 1-ին: Դատական նիստը վարելու են դատավորներ Հենրիկ Տեր-Ադամյանը, Մհեր Արղամանյանը և Արարատ Պետրոսյանը։
Հեղինակ՝ Անի Միրաքյան
