Ամենայն Հայոց Կաթողիկոսն ընդամենը հորդորել է հոգալ կալանավայրերում գտնվող անձանց, այդ թվում՝ ՀՀ երկրորդ նախագահի առողջության հարցերը, և դա չի կարող մեկնաբանվել իբրև եկեղեցու կողմից փորձ՝ մուտք գործելու քաղաքականություն: «Արմնյուզ» հեռուստաընկերության «Օրախնդիր» հաղորդման ժամանակ ասել է Մայր Աթոռ Սուրբ Էջմիածնի տեղեկատվական համակարգի տնօրեն Տեր Վահրամ քահանա Մելիքյանը։
«Եկեղեցին՝ իբրև հաստատություն, իրավունք ունի արտահայտվելու հանրությանը հուզող այս կամ այն խնդրի վերաբերյալ: Ի տարբերություն շատուշատ իշխանությունների՝ եկեղեցին ունի ինստիտուցիոնալ հիշողություն և փորձառություն, որը գալիս է դարերի խորքից, և դա թելադրում է մեզ որոշակի վարքականոններ ու արժեքներ: Մայր Աթոռին որևէ մեկը չի կարող մեղադրել անցած քսանամյակում նմանատիպ հարցերում չարտահայտվելու մեջ», - ասել է նա:
Ըստ Տեր Վահրամի՝ միայն «Մարտի 1»-ի դեպքերի առնչությամբ կաթողիկոսը հինգ ուղերձ է հղել, լարված իրավիճակը հանգուցալուծելու համար եկեղեցին մի շարք քայլեր է ձեռնարկել.
«Եկեղեցին իր պատկան կառույցներով այցելել է և՛ քաղբանտարկյալներին, և՛ այլոց, այդ խնամքը մեր մշտական առաքելության մի մասն է: Մայր Աթոռը բոլոր ժամանակներում էլ գործելու ազատություն է ունեցել, թեև միշտ չէ, որ իշխանության հետ մեր հարաբերություններում ամեն ինչ հստակ է եղել: Եկեղեցին չի եղել ո՛չ տերպետրոսյանական, ո՛չ քոչարյանական, ո՛չ սարգսյանական և ո՛չ էլ փաշինյանական է լինելու»:
Հոգևորականի պնդմամբ՝ ժողովրդի համար արվող գործերի մեծ մասը եկեղեցին չի հանրայնացնում, թեև հասարակական կառույցներից հենց Մայր Աթոռն է ժողովրդին ամենաշատ աջակցություն ցույց տալիս. «Ամենայն Հայոց Հայրապետն առանձին անձ չէ, նրա հնչեցրած տեսակետները մեծ ճանապարհ են անցնում՝ մինչև հանրությանը հասնելը: Եկեղեցին մեկ մարմին է, որտեղ բոլոր որոշումները քննարկվում ու խորհրդակցվում են: Կաթողիկոսի հարցազրույցը Մայր Աթոռի դիրքորոշումն է»:
Տեր Վահրամի պնդմամբ՝ որոշ շրջանակների կողմից փորձ է արվում արհեստական հակադրություն ստեղծել Մայր Աթոռի և Մեծի Տանն Կիլիկիո Կաթողիկոսության միջև, բայց նվիրապետական երկու աթոռներն ունեն փոխըմբռնում և համատեղ օրակարգ.
«Ներհասարակական այս լարվածությունը փարատելու պատասխանատվությունն իշխանությանն է: Հարցազրույց տալիս կաթողիկոսը տեղյակ չի եղել, որ ԱԱԾ-ում Նավասարդ արք. Կճոյանի դեմ քրգործը վերաբացվել է: Ուզում եմ հավատալ, որ այս համընկնումն ընդամենը զուգադիպություն է: Մենք հավատում ենք Նավասարդ Սրբազանի անմեղությանը, նա հարգված եկեղեցական է մեր ժողովրդի կողմից»:
Տեր Վահրամի կարծիքով՝ կաթողիկոսն ընդամենը մարդասիրական առաջարկ է արել, այն չպետք է տեղի տար իշխանության անպարկեշտ արտահայտությունների և վիրավորանքների:
