Երեկ երեկոյան Գավառի բժշկական կենտրոնում տեղի ունեցած միջադեպի հետևանքով վնասվածք է ստացել նաև միջադեպի հետ կապ չունեցող անձ:
Այս մասին գրում է Aysor.am-ը՝ հղում անելով իր աղբյուրներին:
Կայքի աղբյուրի փոխանցմամբ՝ ջարդել են հիվանդանոցի պատերը, դռները, պատուհանները:
«Ոստիկանները տեսել են, որ չեն կարողանում ամբոխի վրա, թույլ են տվել՝ ինչ ուզել են, արել են: Հիվանդանոցի աշխատողները փախել, մտել են սանհանգույցները, եկել են դռները բացել են, ասել են՝ «եկեք շուտ տեղն ասեք որտեղ են, թե չէ հեսա սաղիդ հավաքելու ենք գյուլլենք», աշխատողներն ահավոր սթրեսի մեջ են», - պատմել է աղբյուրը՝ նշելով, որ միայն դանակահարությունից հետո են եկել ոստիկանական մեծ թվով ուժեր։
Նշենք, որ վիրավորներից մեկին գիշերը վիրահատել են. սիրտն է վնասված եղել։
«Վիրավորներին տեղափոխել են Երևան, որ հանկարծ չիմանան՝ ողջ են, նորից հետ գան։ Ոստիկաններն ասել են, որ մահացել են ու դրանից հետո սպանված քննիչի եղբայրը դուրս է եկել, բերանն արյունոտ է եղել, ասել է՝ ես խմել եմ իմ ախպորը սպանողի արյունը», - հայտնել է աղբյուրը։
Նա նշել է, թե ներքևում սպասողներն ասել են՝ մահճակալով պատուհանից գցեք, նրանք էլ վերևից բղավել են՝ «մորթել ենք»։
«Հիվանդանոցում սավան են քաշել դանակահարվածների վրա, իբրև թե, մահացել է ու շտապ տարել են վիրահատարան», - ասել է կայքի աղբյուրը։
Ապրիլի 28-ին, ժամը 17.40-ի սահմաններում Գավառում տեղի ունեցած զինված միջադեպի հետևանքով սպանվել էր 2 մարդ, ևս երկուսը՝ տեղափոխվել էին հիվանդանոց:
ՀՀ քննչական կոմիտեի հատկապես կարևոր գործերի քննության գլխավոր վարչությունում ստացվել և վարույթ են ընդունվել Գավառ քաղաքում երկու անձի սպանելու և չորս անձի հրազենային մարմնական վնասվածքներ պատճառելու, ինչպես նաև՝ մի խումբ անձանց կողմից բռնությամբ և գույքը ոչնչացնելով զուգորդված զանգվածային անկարգությունների դեպքերի առթիվ հարուցված քրեական գործերը, որոնք միացվել են մեկ վարույթում:
Զանգվածային անկարգություններին մասնակցելու կասկածանքով առայժմ ձերբակալվել է 5 անձ:
Կարդացեք նաև՝ Բժշկական կենտրոնում որևէ մեկը չի սպանվել, կան բերման ենթարկվածներ. ոստիկանությունը՝ Գավառի դեպքերի մասին
Վենդետա Գավառում. ոստիկաններին ճեղքելով՝ հիվանդանոցում երկու հոգու վիզ են կտրել
Հայտնի են Գավառի ողբերգական դեպքից մահացածների և վիրավորների անունները. նոր մանրամասներ
Գավառի հիվանդանոց ներխուժածները եղել են 500-ից ավելի, ավիրել են հիվանդանոցը. Մարզպետը մանրամասնում է
Գավառում միջադեպի հետեւանքով մահացածը ռազմական ոստիկանության քննիչ չէ․ ՊՆ խոսնակ
