▲ Դեպի վեր

lang.iso lang.iso lang.iso

Գեորգի Կուտոյան անունով օգտատերը Վիքիպեդիայից 3 անգամ փորձել է ջնջել ԱԱԾ նախկին տնօրենի կենսագրությունը

Հայերեն Վիքիպեդիայից հունվարին մի քանի անգամ՝ այդ թվում նաեւ երեկ փորձել են ջնջել ԱԱԾ նախկին տնօրեն Գեորգի Կուտոյանի կենսագրությունը: Այս մասին «Հայկական ժամանակ»-ի հետ զրույցում ասել է մեդիափորձագետ Սամվել Մարտիրոսյանը:

«Հունվարի 3-ի ցերեկը Գեորգի Կուտոյան անուն ազգանունով Վիքիպեդիայում գրանցված օգտատերը ամբողջությամբ ջնջել է ԱԱԾ նախկին տնօրենի մասին տեղեկությունը»,- ասաց Մարտիրոսյանը:

Նրա խոսքով՝ դրանից հետո հայերեն Վիքիպեդիայի համակարգողներից մեկը մի քանի րոպեից հետո վերականգնել է այդ ջնջված տեղեկությունը:

«Դրանից կես ժամ հետո Գեորգի Կուտոյան անունով օգտատերը նորից մտել եւ ջնջել է այդ տեղեկությունը, որից հետո դարձյալ Վիքիպեդիայի համակարգողներից մեկը վերականգնել է այն»,- ասաց մեդիափորձագետը:

Մարտիրոսյանը նշեց, որ դրանից հետո արդեն երեկ՝ հունվարի 16-ին առավոտյան 09:30-ին Գեորգի Կուտոյան անունով օգտատերը դարձյալ մուտք է գործել համակարգ եւ ջնջել է ամբողջ ԱԱԾ նախկին տնօրենի մասին տեղեկությունը, որից կես ժամ անց Վիքիպեդիայի համակարգողները նորից վերականգնել են այն»:

Մեդիափորձագետն ասաց, որ չի երեւում, թե ով է Գեորգի Կուտոյան օգտատիրոջ հետեւում. «Միայն այդ գործողություններն է արել նա»:

Հարցին՝ իրավապահները կարո՞ղ են բացահայտել, թե որտեղից է մուտք գործել այդ օգտատերը, Մարտիրոսյանը պատասխանեց. «Եթե հատուկ չի պաշտպանվել մուտք գործելուց՝ հնարավոր է հետքը գտնվի: Բայց այնպես չի, թե շանսերը շատ են հայտնաբերելու»:

Հիշեցնենք, որ այսօր Երեւանի Պարույր Սեւակի փողոցի բնակարաններից մեկում հայտնաբերվել է ԱԱԾ նախկին տնօրեն Գեորգի Կուտոյանի դին՝ հրազենային վիրավորումով։ 

Վերահրապարակումներում` մտքերն ու ինֆորմացիան կարող են չհամընկնել խմբագրության տեսակետի հետ: Ձեր տեսակետը կամ հերքումը կարող եք ուղարկել info@asekose.am-ին
Հասարակություն ավելին