a1plus.am-ը գրում է. Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանն այսօր բավարարել է նախաքննական մարմնի ՝ «Նոր Հայաստան» հանրային փրկության ճակատի անդամ Գեւորգ Սաֆարյանի կալանքի ժամկետը եւս 45 օրով երկարացնելու միջնորդությունը:
Գեւորգ Սաֆարյանի պաշտպան Տիգրան Հայրապետյանը նշեց, որ դատարանը մերժել է նաեւ պաշտպանական կողմի միջնորդությունը՝ նրան գրավով ազատ արձակելու համար:
«Որեւէ հիմք քննիչը չուներ: Ասում է՝ ուսումնասիրել են Ազատության հրապարակում Ամանորի գիշերը տեղի ունեցած միջադեպի տեսագրությունը եւ պարզել, որ մի ոտք հարվածում է ոստիկանին: Պետք է պարզեն դա ո՞ւմ ոտքն է: Բայց դա Գեւորգ Սաֆարյանի ոտքը չէ»,- ասաց պաշտպան Տիգրան Հայրապետյանը:
Հիշեցնենք, որ Գեւորգ Սաֆարյանը կալանավորվել է Երեւանի Ազատության հրապարակում Ամանորի գիշերը ընդդիմադիր «Նոր Հայաստանի» անդամների եւ ոստիկանների միջեւ բախումներից հետո: Նա դեկտեմբերի 31-ից գտնվում է անազատության մեջ:
