Կանադահայ համայնքում Կանադայի հայոց թեմի առաջնորդի ընտրության առնչությամբ վերջին օրերին տեղ գտած հուզումների ու անհանգստությունների առչությամբ հարկ ենք համարում տեղեկացնել հետևյալը:
Կանադայի հայոց թեմի 30-րդ պատգամավորական ժողովում թեմի առաջնորդ ընտրվեց Տ. Առեն աբեղա Ճեպեճյանը, ով, սակայն, Կանադայի թեմում համերաշխության վերահաստատման և թեմի ու Հայ Եկեղեցու ընդհանուր շահերի նկատառումով որոշում կայացրեց չստանձնել թեմակալ առաջնորդի պաշտոնը:
Ստեղծված կացության մեջ, Ընդառաջ թեմական խորհրդի խնդրանքին, Գարեգին Բ Ամենայն Հայոց Կաթողիկոսը Տ. Նաթան արքեպիսկոպոս Հովհաննիսյանին ծառայության է նշանակել Կանադայի թեմում` ստանձնելու առաջնորդական տեղապահի պաշտոնը, հավատարիմ Թեմի կանոնադրության`վարելու թեմի ընթացիկ գործերը և թեմական խորհրդի հետ միասին կազմակերպելու թեմի թեմական պատգամավորական 31-րդ ժողովը, որի ընթացքին պիտի կայանան Կանադայի հայոց թեմի առաջնորդի նոր ընտրությունները:
Առաջիկա օրերին Նաթան արքեպիսկոպոսը կմեկնի Կանադա:
ASEKOSE.am-ն ավելի վաղ անդրադարձել էր Կանադայի հայ համայնքի հոգևոր առաջնորդի ընտրություններին: Հիշեցնենք, որ ընտրությունները տեղի են ունեցել մայիսի 25-26-ին` Մոնրեալ քաղաքում: Իրենց թեկնածությունն էին առաջադրել Կանադահայ համայնքի գործող առաջնորդ Գերաշնորհ Տեր Բագրատ եպիսկոպոս Գալստանյանը, Մայր Աթոռ Սուրբ Էջմիածնի միաբան Տեր Տաճատ ծայրագույն վարդապետ Յարդմյանը և ԱՄՆ Չիկագո քաղաքի Սուրբ Գրիգոր Լուսավորիչ եկեղեցու հովիվ Տեր Արեն աբեղա Ջեբեջյանը: 10 տարի Կանադայի համայնքին ծառայած Բագրատ եպիսկոպոս Գալստանյանը 1 ձայնի տարբերությամբ պարտություն էր կրել, ինչն առաջացրել է կանադահայության զայրույթը: Կանադահայ համայքնը դիմել էր Վեհափառին` խնդրելով չվավերացնել կեղծված ընտրությունների արդյունքները:
