«3 տարի է, ինչ աշխատում եմ Develandoo IT ընկերությունում, համատեղության կարգով սովորում եմ Գյումրիի մասնաճյուղի Պոլիտեխնիկական համալսարանի տեղեկատվական տեխնոլոգիաներ բաժնում, տիրապետում եմ 3 լեզվի»,- Asekose.am-ի հետ զրույցում այս մասին հայտնեց 22-ամյա Անի Դարբինյանը:
Վերջինիս խոսքով՝ աշխատանքի բերումով ուսումը ստացիոնարից փոխել է հեռակա:
«Ուսումս համատեղում եմ աշխատանքիս հետ: 3-րդ տարին է, ինչ աշխատում եմ Develandoo-ում և իմ մասնագիտական աճը գրանցում եմ հենց այստեղ: Ինձ հնարավորություն են տվել 3 ամսում դրսևորել իմ կարողությունները, հետո ստացել եմ աշխատանքի հրավեր: 3 ամիս սովորել եմ և 1 ամիս փորձաշրջան եմ անցել, այնուհետև տեղի մասնագետների գնահատականով՝ անցել աշխատանքի: Վստահեցնում եմ, որ ես առաջին ու վերջին մարդը չեմ, ով ստացել է այդ հնարավորությունը»,- պատմեց մեր զրուցակիցը:
Անիի խոսքով՝ աշխատանքն ու ուսումը համատեղելն իր բարդություններն ունի, սակայն մեծ ջանքերի արդյունքում դրանցից և ոչ մեկը չի տուժում:
«Կարող եմ ասել, որ ինձ համար պակաս դժվար չէ, քան ուսումն ու աշխատանքը համատեղող մյուս մարդկանց համար, քանի որ ես դրանք համատեղում եմ քաղաքների հեռավորության վրա: Հաճախում եմ դասերին, մասնակցում եմ բոլոր քննություններին, աշխատաnքիս վայրից էլ, բնականաբար, կա փոխզիջում, քանի որ որոշ օրեր աշխատանքի մասնակցում եմ մասնակի ժամերով: Ինձ համար երկուսն էլ կարևոր են, չեմ կարող առանձնացնել, մեկը մյուսի հետ փոխկապակցված են:
21-րդ դարում լեզվի չիմացությունը մարդկանց բազում խնդիրների առաջ կարող է կանգնեցնել, սակայն Անիին դա հաստատ չի սպառնում:
«Տիրապետում եմ հայերենին, ռուսերենին և անգլերենին, ընդ որում՝ ռուսերենին տիրապետում եմ հայերենին հավասարազոր, իսկ անգլերենը շարունակում եմ դեռ զարգացնել, որպեսզի վերջնականապես ամրապնդեմ լեզվի իմացությունս: Նշեմ նաև, որ ուզում եմ 4-րդ լեզու սովորել՝ իսպաներեն կամ իտալերեն»:
Անին դեռ շատ ծրագրեր ունի, քանի որ կարծում է, որ կատարելագործվելու տեղ մարդ միշտ էլ ունի :
«Հնարավոր է, որ ուսումս շարունակեմ արտերկրում, եթե, իհարկե, ունենամ լավ տարբերակ: Մասնագիտական մեծ աճ ունենալու ցանկություն ունեմ, ուզում եմ տեսնել, թե Եվրոպայում ինչպես է ընթանում մեր աշխատանքը, քանի որ բոլորս էլ գիտենք, որ IT ոլորտը շատ մեծ տարածում ունի ամբողջ աշխարհում: Ցանկություն ունեմ ուժերս փորձելու նաև դրսում, այս պահին ձգտում եմ դրան»:
Մեր զրուցակիցը վստահեցնում է, որ կյանքում անհնարին ոչինչ չկա, եթե կա ցանկություն և ձգտում:
«Ես սկսել եմ աշխատել 18 տարեկանից և կարծում եմ, որ բացառություն չեմ, այսինքն՝ ցանկացած ոք, ով ունի առաջ գնալու ցանկություն և ձգտում, կարող է հասնել այդ արդյունքին, 22 տարեկանում հասնել այն սանդղակին, որին ես եմ հասել: Մարդկանց մեջ պարզապես կարծրատիպ է ամրացած, որ 22 տարեկանում հնարավոր չէ հասնել այս ամենին: Ցավոք, մեր հայ աղջիկների մեջ կա այդ կարծրատիպը՝ դպրոց, համալսարան, ամուսնություն: Կցանկանամ, որ այդ մտածելակերպը փոխվի, որ աղջիկներն էլ ձգտեն աշխատել, չսահմանափակեն միայն դիպլոմով, քանի որ ամենալավ բանն է, երբ այդ տարիքում մարդը իր 2 ոտքերով ամուր կանգնած է հողի վրա: Դրանից լավ գնահատական մարդ իր համար չի կարող գտնել»,- Asekose.am-ի հետ զրույցում նշեց Անի Դարբինյանը:
Հիշեցնենք, որ օրերս ՀՀ վարչապետ Նիկոլ Փաշինյանը ֆեյսբուքյան իր ուղիղ եթերի ժամանակ, պատասխանելով օգտատերերից մեկի այն դիտարկմանը, որ 22 տարեկանում պահանջում են բարձրագույն կրթություն, երեք տարվա աշխատանքային ստաժ և երեք լեզուների իմացություն, նշել էր.
«Առաջին հայացքից կարող է թվալ, որ իսկականից աբսուրդ է, բայց եթե նայում ենք ժամանակակից չափանիշների տրամաբանությունից, մեր խնդիրը պետք է հենց դա լինի, որ Հայաստանի Հանրապետության միջին վիճակագրական քաղաքացին կամ առնվազն քաղաքացիների մի մասը, կամ առնվազն իգական սեռի ներկայացուցիչները, որոնք ժամկետային զինվորական ծառայություն չեն անցնում, 22 տարեկանում, այո՛, պետք է ունենա բարձրագույն կրթություն, երեք լեզու պետք է իմանա և երեք տարվա մասնագիտական ստաժ ունենա»:
Կարդացեք նաև՝ Չի կարող կրթություն ունեցող մարդը որևէ ոլորտում աշխատանք չգտնել. եթե չի կարող գտնել, ապա՝ կարող է ստեղծել. Փաշինյան
Հեղինակ՝ Լ. Նավասարդյան