Գրեթե մեկ ամիս առաջ հայտնի դարձավ, որ «Ընդդեմ իրավական կամայականության» ՀԿ-ն՝ ՀԿ նախագահ, ՀՀ մարդու իրավունքների նախկին պաշտպան Լարիսա Ալավերդյանի գլխավորությամբ պատրաստվում է ադրբեջանական գերությունից վերադարձած Մամիկոն Խոջոյանի գործով հայց ներկայացնել Մարդու իրավունքների եվրոպական դատարան:
Հիշեցնենք, որ հունվարի 28-ին Տավուշի մարզի Վերին Կարմիրաղբյուր գյուղի 77-ամյա բնակիչ Մամիկոն Խոջոյանը հատել էր հայ-ադրբեջանական սահմանը, գերեվարվել Ադրբեջանում, ապա մարտի 4-ին հայ-ադրբեջանական սահմանագծի հյուսիսարևելյան հատվածում Կարմիր խաչի միջազգային կոմիտեի հովանու ներքո վերադարձվել հայկական կողմին՝ առողջական լուրջ խնդիրներով:
Մամիկոն Խոջոյանը միայն այսօր է դուրս գրվել հիվանդանոցից:
Վերադարձից հետո ՀՀ պաշտպանության նախարարությունն անմիջապես արձանագրել էր, որ Մամիկոն Խոջոյանը լուրջ առողջական խնդիրներ ունի:
Առաջին իսկ օրը հետազոտությունների արդյունքում պարզվեց, որ մարմնի վրա բազմաթիվ կապտուկներ, կոտրվածքներ և վնասվածքներ կան՝ այդ թվում՝ հրազենային վնասվածք: Նշված վնասվածքների մասին չէր ասվել ադրբեջանական լրատվամիջոցների կողմից նախկինում հեռարձակված տեսանյութերում և հաղորդագրություններում, ինչը վկայում է, որ Մամիկոն Խոջոյանը վնասվածքները ստացել է ադրբեջանական կողմում գերության մեջ գտնվելու ժամանակահատվածում:
ASEKOSE.am-ի թղթակիցը փորձեց պարզել, թե որ փուլում է գործընթացը և երբ կներկայացվի հայցը ՄԻԵԴ:
Մեզ հետ զրույցում Լարիսա Ալավերդյանը նշեց, որ հայցը պատրաստվում է, գործընթացն իր բնական հունով է ընթանում:
«Ինչպես ես ասել էի՝ 2 շաբաթվա ընթացքում պետք է ավարտվեր առաջին փուլը. ստանայինք համաձայնություն և պայմանավորվածություն ձեռք բերեինք մեր քննչական և այլ մարմինների հետ, որովհետև մեզ անհրաժեշտ են բոլոր նյութերը, որոնք պետք է դատական գործընթաց անցնեն այստեղ: Այդ բոոլոր քայլերն արված են»,- նշեց մեր զրուցակիցը, ապա հավելեց.
«Մամիկոն Խոջոյանը կազդուրվում է: Համաձայն է, որ իր շահերը ներկայացնեն իր դուստրերն ու որդին: Երբ ստանանք առաջին նյութերը, անցնելու ենք հաջորդ փուլին: Մենք աշխատելու ենք և հորդորելու ենք, որ դատական գործընթացն այստեղ արագ անցնի, որպեսզի արդյունքները ներկայացնենք ՄԻԵԴ, ունենանք փաստեր, որ գործն այստեղ դատական ճանապարհ է անցել: Իհարկե, հասկանալի է, թե ինչ պատճառներով մեղադրվող կողմը չի կարող հանդես գալ: Այսպիսով՝ գործընթացը բնականոն հունի մեջ է»:
Ինչ վերաբերում է ակնկալիքներին՝ Լարիսա Ալավերդյանի խոսքով.
«Ակնկալիքները շատ ռեալ են ու դրական: ՄԻԵԴ-ի նախադեպային գործերը միշտ ավարտվում են հստակ ձևավորված պահանջներով: Նախնական որոշումները հոգուտ տուժածների են:
Հասմիկ Գյոզալյան
