Դիտեք նաև՝

Երեկ ավարտվեց ժամկետը, երբ կուսակցություններն ու կուսակցությունների դաշինքները կարող էին Կենտրոնական ընտրական հանձնաժողով (ԿԸՀ) ներկայացնել հունիսի 20-ին կայանալիք Ազգային ժողովի արտահերթ ընտրություններին մասնակցելու համար պահանջվող փաստաթղթերը:

Այս մասին գրում է Armtimes.com-ը։

Երեկոյան Կենտրոնական ընտրական հանձնաժողովը հրապարակեց ցուցակը, ըստ որի՝ սահմանված ժամկետում ԿԸՀ գրանցման համար փաստաթղթեր էին ներկայացրել 23 կուսակցություն և կուսակցությունների 4 դաշինք։ Նկատենք, սակայն, որ հրապարակված ցուցակում բացակայում էր երգիչ և իրեն նաև քաղաքական գործիչ հռչակած Մհեր Արմենիայի (Մհեր Մեսրոպյան) «Ազգի ձայնը» կուսակցությունը, այնինչ լրագրողները արձանագրել էին, որ Մհերը ներկայացել էր ԿԸՀ:

Ճշտելու համար, թե ինչ խնդիրներ են առաջացել, որոնց պատճառով «Ազգի ձայնը» կուսակցության անունը չկար ընտրություններին մասնակցող կուսակցությունների և դաշինքների կողքին, կայքը փորձել է կապ հաստատել երգչի հետ, սակայն որևէ կերպ դա չի հաջողվել: Նրա հեռախոսահամարը երեկվանից անջատված է:

Հարցի վերաբերյալ կայքը փորձել է մեկնաբանություն ստանալ նաև Կենտրոնական ընտրական հանձնաժողովից: ԿԸՀ-ի մամուլի խոսնակ Հերմինե Հարությունյանը զրույցի ընթացքում ասել է, որ եթե ներկայացված ցուցակում չի նշվում որևէ կուսակցություն, նշանակում է այդ կուսակցությունը կամ դաշինքը չի ներկայացրել փաստաթղթեր:

«Մեզ հայտնի չեն պատճառները, թե ինչու որևէ կուսակցություն կամ դաշինք չի ներկայացրել փաստաթղթեր»,- ասել է նա:

Դիտարկմանը, որ «Ազգի ձայնը» կուսակցության ղեկավար Մհեր Մեսրոպյանը երեկ ներկայացել է ԿԸՀ, Հերմինե Հարությունյանը պատասխանել է.

«Միգուցե ներկայացել է, բայց փաստաթղթեր չի ներկայացրել հանձնաժողովին, որպեսզի գրանցվի՝ որպես ընտրություններին մասնակցել ցանկացող կուսակցություն: Չկա որևէ կուսակցություն կամ դաշինք, որ ներկայացնի փաստաթղթեր, և այդ փաստաթղթերը չընդունվեն»,- նշել է մամուլի խոսնակը:

Ամբողջական նյութը՝ սկզբնաղբյուր կայքում