ՀՀ վարչապետ Նիկոլ Փաշինյանը ՀՀ երկրորդ նախագահ Ռոբերտ Քոչարյանի ծննդյան տարեդարձի կապակցությամբ ՌԴ նախագահ Վլադիմիր Պուտինի շնորհավորանքի մեջ քաղաքական ենթատեքստ չի տեսնում. այս մասին նա հայտարարեց այսօր՝ սեպտեմբերի 4-ին, լրագրողների հետ զրույցում։
«Դա անձնական հարաբերությունների հարթակում էր: Հասցնելով ճանաչել ՌԴ նախագահին, կարող եմ ասել, որ նա մարդկային կապերը շատ գնահատում է և պահպանում է՝ աշխարհի տարբեր երկրների նախկին և ներկա ղեկավարների հետ: Դուք տեսաք, որ վերջերս, Եվրամիության հետ բավականին պրոբլեմատիկ հարաբերություններ ունեն, բայց նա մասնակցեց Ավստրիացի բարձրաստիճան պաշտոնյայի հարսանյաց արարողությանը»,- ասաց վարչապետը:
Անդրադառնալով ՌԴ ԱԳ նախարար Լավրովի այն հայտարարությանը, որ Հայաստանում ներքաղաքական իրավիճակը շարունակում է եռալ, վարչապետն արձագանքեց. «Դե, շոգ էր այսօր բավականին, իսկապես»:
Վարչապետը նշեց նաև, որ սեպտեմբերի 8-ին Վլադիմիր Պուտինի հետ կայանալիք հանդիպմանը քննարկելու են երկկողմ հարաբերությունների ողջ ընթացքը: