ՌԴ նախագահ Վլ.Պուտինն ամենամյա մամլո մեծ ասուլիսի ժամանակ պատասխանելով Թուրքիայի լրագրողի հարցին և ակնարկին, որ իրենից հետո նրանց երկիր են ժամանել Եվրոպայի ներկայացուցիչներն ու առաջարկել միանալ Ռուսաստանի դեմ կիրառվող պատժամիջոցներին, Պուտինն ասաց.
«Ես չեմ կասկածում, որ Եվրոպան կփորձեր համոզել Թուրքիային»:
Նա միաժամանակ նշեց, որ Թուրքիայի հետ ընդհանուր տարածաշրջանային շահեր ունեն:
«Հետևաբար մենք շահագրգռված ենք այդ հարաբերությունների զարգացմամբ»,-նշեց ՌԴ նախագահը՝ հավելելով, որ խնդրել է Թուրքիայի նախագահին, որ նա համատեղ մի շարք նախագծերի մասին չխոսի, չգովազդի.
«Նա ուժեղ մարդ է»,-հավելեց Վլ.Պուտինը:
Հնչեց նաև հարց ԵՏՄ-ի վերաբերյալ.ղազախական հեռուստաընկերության լրագրողը հարցրեց, թե արդյո՞ք ներկայիս տնտեսական խնդիրները չեն ազդի ինտեգրման գործընթացների վրա:
«Հունվարի 1-ից ՌԴ-ն, Ղազախստանը, Բելառուսը, Հայաստանը, հնարավոր է` նաև Ղրղզստանը ընդհանուր շուկա ունենան, չի՞ վերաճի ընդհանուր շուկան ընդհանուր ճգնաժամի»,-հարցրեց լրագրողը:
Պուտինը պատասխանեց, որ ռուսական տնտեսության աճն անխուսափելի է` միջազգային տնտեսության աճի, ռուսական տնտեսության` էներգակիրների նոր գնին աստիճանաբար հարմարվելու հաշվին: Նշեց նաև, որ միասին այդ ճգնաժամն հաղթահարելն ավելի հեշտ կլինի:
