ՌԴ նախագահ Վլադիմիր Պուտինը, ի պատասխան Արևմուտքի ագրեսիվ հայտարարությունների, ՊՆ-ին հրահանգել է հատուկ հերթապահության մեջ դնել ռուսական զսպիչ ուժերը։ Այս մասին հայտնում է ՏԱՍՍ-ը։
ՌԴ պաշտպանության նախարար Սերգեյ Շոյգուի և ՌԴ ԶՈւ գլխավոր շտաբի պետ Վալերի Գերասիմովի հետ հանդիպմանը Պուտինը նշել է, որ Արևմուտքը ոչ միայն ոչ բարեկամական գործողություններ է իրականացնում տնտեսական ոլորտում Մոսկվայի նկատմամբ, այլև թույլ է տալիս ագրեսիվ հայտարարություններ։
«Ուստի, պաշտպանության նախարարին և գլխավոր շտաբի պետին հանձնարարում եմ ռուսական բանակի զսպման ուժերը տեղափոխել մարտական հերթապահության հատուկ ռեժիմ»,- ասել է նա։
Հիշեցնենք, որ փետրվարի 24-ին Պուտինը հայտարարեց Դոնբասում հատուկ գործողության մեկնարկի մասին, որի ընթացքում ռուսական իշխանությունները «կձգտեն ապառազմականացնել և ապազգայնացնել Ուկրաինան»։
Ի պատասխան՝ ԵՄ երկրները, ինչպես նաև Մեծ Բրիտանիան, ԱՄՆ-ը, Կանադան և այլք սկսեցին պատժամիջոցներ կիրառել Ռուսաստանի դեմ։