Lragir.am կայքում լույս տեսած՝ «Արցախի հերոսի ակնարկը Սերժ Սարգսյանին ու մյուսներին. Ուշագրավ մանրամասներ հանդիպումից» հոդվածում կատարված ակնարկը իմ անձի շուրջ (սակայն հետագայում այն անհետացել է հոդվածից) հեյրուրանք էր:

ՀՀ նախագահի հետ հանդիպման մանրամասներին, բնականաբար, չեմ կարող անդրադառնալ, քանի որ այդ մասին հաղորդվել է այնքանով, որքանով տրվել է պաշտոնական հաղորդագրության մեջ, սակայն եթե որևէ մեկը փորձում է առիթից օգտվելով պղտոր ջրում ձուկ որսալ, սա արդեն անընդունելի է: Իմ տեսակետը Ղարաբաղյան հիմնախնդրի շուրջ ընթացող բանակցությունների վերաբերյալ բազմիցս արտահայտել եմ և հիմա էլ կարող եմ կրկնել, որ վերջին խոսքը պատկանում է Արցախի ժողովրդին: Այլ լուծում, իմ պատկերացմամբ, գոյություն չունի: Գոնե վերջին շրջանում մեկ անգամ չէ, որ հնարավորություն եմ ունեցել այդ մասին մամուլում խոսելու:

Եթե տարածքների մասով ուղիղ խոսքի հարցադրում կա, ապա ասեմ հետևյալը. ես, որպես ծնունդով Մարտակերտի շրջանից, մտածում եմ ոչ միայն տարածք չհանձնելու, այլ նաև 90-ականներին Ադրբեջանի կողմից օկուպացված Մարտակերտի շրջանի գյուղերի և Շահումյանի շրջանի ազատագրման մասին: Եվ Ադրբեջանի կողմից Արցախի նկատմամբ եթե կրկնվի ռազմական ագրեսիան, մենք այս իմաստով հստակ անելիք ունենք և ռազմական գործողությունները կտեղափոխենք Ադրբեջանի տարածքի խորքերը:

Խաղաղություն և միասնություն բոլորիս:

Ռուդիկ Հյուսնունց, 

ԼՂՀ Ազգային Ժողովի պատգամավոր