Newmag.am-ը զրուցել է երգչուհի Սիրուշոյի հետ՝ իր նոր ալբոմի, տեսահոլովակների և որդիների մասին: Ներկայացնում ենք զրույցից մի հատված:
Արտակ – Իմ տղան և աղջիկը քնում են «Մութն ընկել է, ուշ է արդեն» երգի տակ՝ Ձեր կատարումով: Ձե՞ր երեխաներն ինչ երգի տակ են քնում:
Սիրուշո – Տարօրինակ է, բայց իմ երեխաները չեն քնում որևէ երգի տակ: Փորձել եմ այնպես անել, որ իրենք իրենց քնեն:
Արտակ – Կենդանի կատարմամբ են երևի քնում:
Սիրուշո – Հենց դա է. միշտ կատակում են, որ տանը երևի երգող չկա, որ երգի տակ չեն քնում: Բայց ես ուղղակի փորձել եմ սովորեցնել, որ առանց որևէ երգ-երաժշտության քնեն: Շատ պարզ պատասխան:
Արտակ – Ձեր երեխաները երաժշտական լսողություն ունե՞ն: Ստուգե՞լ եք, թե՞ դեռ շուտ է:
Սիրուշո – Փոքրս 5 ամսական է, չգիտեմ, մեծս՝ ո՛չ: Երգելու, կատարելու առումով՝ ո՛չ: Չգիտեմ՝ հետո ինչ կլինի:
Արտակ – Դուք ավելի շատ երևանյան աղջիկ եք: Մենք գիտենք՝ ովքեր են Ձեր ծնողները, պապերը որտեղից են եկել: Մեծացել եք բոլորիս աչքի առջև: Բոլորը միշտ համոզված են եղել, որ Դուք միշտ Երևանում եք լինելու: Ինչո՞ւ որոշեցիք ծննդաբերել ԱՄՆ-ում:
Սիրուշո – Կարծում եք, որ բոլորը համոզվա՞ծ են: Կան մարդիկ, ովքեր նույնիսկ համոզված են, որ ես այստեղ չեմ ապրում: Չէի ուզում այդ շրջանում ուշադրության կենտրոնում լինել: Դա մի շրջան է, երբ չես կարող ուշադրության կենտրոնում չլինել: Այդ է պատճառը, որ երկրորդ երեխաս էլ ծնվեց Ֆրանսիայում: Այստեղ ո՛չ Ամերիկան է հարցը, ո՛չ էլ Ֆրանսիան: Ամերիկայում ես երկար ժամանակ եմ անցկացրել, ունեմ շատ ընկերներ, ընտանիք, շատ հարազատներ: Ինձ համար հարազատ մի վայր է:
Արտակ – Այո՛: Դուք գո՞հ եք այն կյանքից, որով ապրում եք: Գո՞հ եք անցնող 30 տարիներից:
Սիրուշո – Երբեմն ետ եմ նայում ու պարզում, որ շատ բաներ եմ հասցրել անել: Ինձ թվում է, որ մի քանի կյանք եմ ապրել : Ու ինչպե՞ս եմ հասցրել այդքանը անել: Բայց զգացում կա, որ ես կարող էի 10 անգամ ավելին անել: Տասը չէ, 100: Երևի այդ զգացումը բոլորն ունեն: 30 տարիների ընթացքում էնպիսի բաներ եմ արել, որ չեմ հիշում: Հիշողությունս էլ վատ է, սկսել եմ ավելի շատ բաներ մոռանալ, որովհետև շատ լի էր կյանքս և դեռ է՛: Որովհետև շատ վաղուց է սկսվել:
Ամբողջական նյութը՝ սկզբնաղբյուր կայքում