«Փաստինֆո»-ն գրում է. ՀՀ վերաքննիչ քաղաքացիական դատարանը մերժել է Գորիսի նախկին քաղաքապետ Սամվել Հարությունյանի վերաքննիչ բողոքը: Վերաքննիչ դատարանը ՀՀ Սյունիքի մարզի ընդհանուր իրավասության դատարանի՝ 29.10.2014թ. վճիռը Սամվել Հարությունյանն ընդդեմ Սյունիքի մարզպետ Սուրիկ Խաչատրյանի, հայցադիմումի գործով թողել է անփոփոխ, օրինական ուժի մեջ:
Հայցվոր Սամվել Հարությունյանը ներկայացված հայցադիմումով՝ հիմք ընդունելով լրատվական կայքում տեղադրված տեսանյութը՝ որտեղ լրագրողի՝ «Ձեր ընդդիմախոսներից, մասնավորապես՝ Սամվել Հարությունյանը, Ձեր հասցեին այդքան մեղադրանքներ է հնչեցնում» հարցադրմանը Սուրիկ Խաչատրյանը պատասխանել է՝ «Չեմ կարծում, որ հոգեկան հիվանդի մասին հիմա ես պետք է ինչ-որ բացատրություններ տամ», հայցվորը դատարանից խնդրել է պատասխանողին պարտավորեցնել հրապարակայնորեն` նույն կայքի միջոցով ներողություն խնդրել իրենից` «հոգեկան հիվանդ» հրապարակային արտահայտության համար և պատասխանողից հօգուտ իրեն բռնագանձել սահմանված նվազագույն աշխատավարձի 1000-ապատիկի չափով փոխհատուցում:
Ըստ հայցվորի, ակնհայտ է, որ պատասխանողի կողմից իր հասցեին արված «հոգեկան հիվանդ» հրապարակային արտահայտությունը արատավորում է իր պատիվն ու արժանապատվությունը և ՀՀ քաղաքացիական օրենսգրքի իմաստով՝ վիրավորանք է։
Վերաքննիչ դատարանն արձանագրել է, որ հայցվորի կողմից չի ապացուցվել, որ պատասխանողի կողմից վիրավորանք պարունակող արտահայտությունը ուղղված է եղել հայցվորին՝ այդ պարագայում գործի լուծման համար էական նշանակություն ունեցող փաստի չապացուցման բացասական հետևանքները կրում է հայցվորը:
Նման պայմաններում Վերաքննիչ դատարանը հիմնավոր է համարում առաջին ատյանի դատարանի այն եզրահանգումը, որ գործի լուծման համար էական նշանակություն ունեցող և դատաքննությամբ հետազոտված լրատվական կայքի տեսանյութում հարցազրույցի ժամանակ լրագրողի կողմից չի մասնավորեցվել, թե որ Սամվել Հարությունյանի մասին է խոսքը: Վերաքննիչ դատարանը արձանագրել է, որ մեկ այլ անձ՝ Գորիսում բնակվող Սամվել Հարությունյանը նույնպես հայցադիմում է ներկայացրել դատարան ընդդեմ Սուրիկ Խաչատրյանի` լրատվական կայքի միջոցով «հոգեկան հիվանդ» արտահայտության համար հրապարակայնորեն ներողություն խնդրելուն պատասխանողին պարտավորեցնելու պահանջի մասին:
Ընդ որում` թե՛ հայցադիմումի դեմ ներկայացված առարկությամբ, և թե՛ դատաքննությամբ սկզբնական հայցով պատասխանողի ներկայացուցիչը ցուցմունք է տվել այն մասին, որ Սուրիկ Խաչատրյանի կողմից լրատվական կայքում հնչեցված «հոգեկան հիվանդ» արտահայտությունը ուղղված է եղել ոչ թե Երևանում բնակվող Սամվել Հարությունյանին, այլ ուղղված է եղել Գորիսում բնակվող Սամվել Հարությունյանին, որը նույնպես մեղադրանքներ է ներկայացրել Սուրիկ Խաչատրյանի հասցեին: Այսպիսով, Վերաքննիչ դատարանը հիմնավորված չի համարել վերաքննիչ բողոքի հիմքերը և գտել, որ առաջին ատյանի դատարանը՝ իրականացնելով լրիվ, օբյեկտիվ և բազմակողմանի քննություն, թույլ չի տվել վերաքննիչ բողոքում վկայակոչված և գործի ելքի վրա ազդեցություն ունեցող դատական սխալ: