Ազգային ժողովում Մարտի 1-ի հարցով լսումների ժամանակ Երևանի ավագանու անդամ, նախկին պատգամավոր Անահիտ Բախշյանը հիշեց զորքը քաղաք մտցնելու պատմությունը և Սերժ Սարգսյանի խոսքերը:
«Պատգամավորներով հավաքվել ու քննարկում էինք, որ զորքը մտնում է Երևան: Ես չգիտեմ դուք գիտեիք, թե ոչ, բայց ի լուր աշխարհի ասում եմ հետևյալը՝ Լարիսա Ալավերդյանը վերցրեց հեռախոսն ու զանգեց Սերժ Սարգսյանին: Ասաց՝ պարոն Սարգսյան, խորհուրդ եմ տալիս, հորդորում եմ չշտապել, թողեք թող լույսը բացվի: Ասաց՝ մի արեք, զորքը մտնում է քաղաք, մի արեք դա: Եվ ի՞նչ ասաց Սերժ Սարգսյանը, ասաց՝ արդեն ուշ է: Ես սա հայտարարում եմ ոչ պատահական տեղ: Այսինքն՝ այն բոլոր փաստերը, որոնք ներկայացրեց պարոն Քոչարյանը՝ որպես Փաստահավաք խմբի անդամ, համապատասխանում են իրականությանը, որ զորքը պատրաստ էր, սպասում էր հարմար առիթի»,- ասել է Բախշյանն ու նշել է, որ այդ ամենը կարող էր մարել, եթե իշխանությունը նման քայլերի չգնար:
«Բայց չէ, իրենց պետք էր դաս տալ հասարակությանը, որ՝ չհամարաձակվես, ընտրության արդյունքը չդնես քննարկման, մենք կանք ու պիտի լինենք ցանկացած գնով, 10 զոհի գնով»,- հայտարարել է նա:
Բախշյանի խոսքով՝ Մարտի 1-ը մի ուղերձ էր ՀՀ ժողովրդավարությունը կերտող հասարակությանը, որ՝ չի լինելու, չենք ուզում քաղաքացիական հասարակություն, դուք պիտի լռեք:
«Դուք ամեն անգամ քաղաքացու իրավունքը բնում խեղդում եք, և այս վախի մթնոլորտի պայմաններում շատ ավելի վատ հետևանքներ կարող ենք ունենալ»,- ասել է նա:
Դիտեք նաև՝
