Այսօր՝ ապրիլի 12-ին, Գյումրու նախկին քաղաքապետ, «Ծառուկյան» դաշինքով առաջադրված եւ Ազգային ժողով անցած Վարդան Ղուկասյանը հայտարարությամբ է հանդես եկել եւ տեղեկացրել, որ իրականում ինքը հավաքել է 15 հազարից ավելի ձայն, բայց 3 հազարը վերագրել են այլ թեկնածուների: Վարդան Ղուկասյանի ֆեյսբուքյան էջում արված հայտարարությունում, մասնավորապես, ասվում է.
«Ս/Թ ապրիլ 2-ին կայացած ընտրությունների պատկերը պարզ է: Պարզ է ե՛ւ ընտրողների, ե՛ւ ընտրվողների, ե՛ւ կենտրոնական հանձնաժողովի համար: Ապրիլի 3-ից մինչ այսօր Շիրակի մարզում «Ծառուկյան» դաշինքի ռեյտինգային թեկնածու Վարդան Ղուկասյանի ձայները ԿԸՀ-ից հայտնում են 12 485 ձայն, բայց դա չի համապատասխանում իրականությանը: Ընտրական նոր տեխնոլոգիաների պատճառով մենք կորցրել ենք ավելի քան երեք հազար ձայն: Այդ իսկ պատճառով թվերը չեն համապատասխանում իրական քվեին: Մենք բոլորս ավելի քան վստահ ենք, որ մեր հավաքած ձայների քանակը հատում է տասնհինգ հազար ձայնը, բայց մենք մեծահոգաբար ենք վերաբերվում ձայների այդպիսի տեղաբաշխմանը եւ հույս հայտնում, որ մյուս թեկնածուները, ում օգտին հաշվարկվել են մեր ձայները, քաջ գիտակցում են դա եւ եւս շնորհակալ են մեզանից:
Վարդան Ղուկասյանի գրասենյակ»,- գրված է հայտարարությունում:
Armtimes.com-ը Վարդան Ղուկասյանից փորձեց պարզել, թե մասնավորապես որ թեկնածուներին են վերագրվել այդ քվեները: Նրա հետ մեր զրույցը ներկայացնում ենք ստորեւ:
- Պարոն Ղուկասյան, Ձեր տարածած հաղորդագրությունից տեղեկանում ենք, որ խորհրդարանական ընտրության ժամանակ ստացել եք 15 հազարից ավելի քվե…
- Ինչ որ տեղեկացել ես, դա է, հստակ գրված է՝ սեւը սպիտակի վրա:
- Նշված է նաեւ, որ մոտ երեք հազար ձայն վերագրված է այլ թեկնածուների: Ու՞մ մասին է խոսքը, անուններ կնշե՞ք:
- Ո՛չ, ո՛չ:
Առավել մանրամասն՝ սկզբնաղբյուր կայքում
