Փետրվարի 25-ին, Բուլղարիայի Հայերի Միության նախաձեռնությամբ և օրհնությամբ Վառնայի ս. Սարգիս հայկական եկեղեցու հոգևոր հովիվ Արժ. Տ. Բարթողիմեոս քհն. Հակոբյանի, Վառնայի «Զոր. Անդրանիկ» հրապարակում տեղադրված հայ ազգային հերոս, հայ և բուլղար ժողովուրդների ազատագրության մարտիկ Զորավար Անդրանիկ Օզանյանի արձանի դիմաց տեղի կունենա միջոցառում՝ նվիրված Մեծն Զորավարի ծննդյան 150 ամյակին, տեղեկացնում են Բուլղարիայի Հայերի Միության մամլո կենտրոնից:«Փետրվարի 25-ին, ժամը 17:30-ին, Վառնայի Գալատա թաղամասի «Զոր. Անդրանիկ» հրապարակում տեղադրված նրա հուշարձանի մոտ տեղի կունենա Հոգեհանգստյան կարգ և ծաղիկների ու ծաղկեպսակների զետեղում՝ ի հիշատակ Մեծն Զորավարի:
Կոչ ենք անում բոլոր նրանց, ովքեր ցանկանում են այդ օրը մեզ հետ միասին հիշատակել հայ ազգային հերոս Զոր. Անդրանիկի 150-ամյա հոբելյանը, ինչը ամեն մի հայորդու սրբազան պարտքն է Մեծն Զորավարի անմահ հիշատակի առջև, մինչև ժամը 17:00-ը լինել Վառնայի ս. Սարգիս եկեղեցու բակում, որտեղից մեքենաների շարասյունը կշարժվի դեպի միջոցառման վայրը:», ասված է ԲՀՄ մամլո կենտրոնի հաղորդագրության մեջ:
