Այսօր ողջ հայությունը հպարտությամբ ու մեծ շուքով նշում է Հայաստանի Առաջին Հանրապետության 100-ամյակը:
-Սա շատ թանկ, սրբազան ու անփոխարինելի օր է: Այն, ինչ ձեռք ենք բերել, պետք է պահպանվի: Փառք Աստծո, վերջին մաքրագործումները, ազգանպաստ տեղաշարժերը եկան վերականգնելու հույսը և ուժեղացնելու հայոց պետականության կերտումը,-լրագրողների հետ հանդիպման ժամանակ ասաց գրականագետ Դավիթ Գասպարյանը:
Հովհաննես Թումանյանի թանգարանի տնօրեն Նարինե Թուխիկյանն էլ նշեց, որ կան ոչ միայն պատմագիտական փաստեր, այլև հուշագրություններ, որոնք շատ հուզիչ են:
-Տպավորվել են Քաջազնունու հուշերը՝ Բաթումիի պայմանագրի մասին: Ներկայացնում է, թե ի՞նչ երկխոսություններ եղան պատգամավորների միջև, և այն, թե որքան կոտրված էր ինքը, չնայած արդեն ստորագրել էր: Տարածաշրջանային, աշխարհաքաղաքական իրողություններ կային, որոնք խափանեցին անկախության հարատևությունը: Առաջին հանրապետության այս կամ գործչին մեղադրելու իրավունք չունեմ, քանի որ մասնագետ չեմ: Հետաքրքիր է, որ 100-րդ տարելիցը նշում ենք առանց ռեժիմի, որն ամենամեծ ձեռքբերումն է,-նշեց Նարինե Թուխիկյանը:
