«Տասնյակ տարիներով քանդած ճանապարհները կառուցում ենք, մայթը կառուցում, վերականգնում ենք, հետո գնում, տեսնում ենք՝ մեկը մի ավտո ավազ թափել ա մայթի վրա, մեկը ասֆալտի վրա բետոն ա անում։ Հետո որ տեղի պաշտոնյանին ասում ես՝ էս ինչա՞, աչքերը ճպճպացնում ա»,- կառավարության նիստի ժամանակ ասաց Փաշինյանը՝ անդրադառնալով նոր կառուցված ճանապարհները անձնական նպատակներով քանդելու, փչացնելու խնդրին։ «Հանրային տարածքը չի կարելի վերցնել տենց անձնական նպատակներով։ Մարդը մայթով քայլում ա, մեկ էլ տեսնում ա 61 թականի արտադրության Գազ 66-ի ռամա՝ դրած մայթի վրա։ Բա պապուց հիշատակ մնացած ռաման ա։ Է տարեք ձեր տանը դրեք, կախեք պատից պապու հիշատակը»,- ասաց Փաշինյանը։ «Չի կարելի սենց անտարբեր լինել, բա տեղի մարդիկ ինչո՞վ են զբաղված, մարզպետ կա, համայնքի ղեկավար կա, ավագանի կա։ Վախենում են էդ պապու թոռան ձայնը կորցե՞ն ընտրություններին»,- շարունակեց նա՝ մարզպետներին հորդորելով շրջել մայթերով ու նման դեպքերում վարչական միջոցներ կիրառել։

***

2024 թվականի ձմեռային զորակոչը կանցկացվի նոյեմբերի 25-ից մինչև 2025 թվականի հունվարի 31-ը ներառյալ, որոշումն ընդունվեց կառավարության այսօրվա նիստում։

Որոշումը նախատեսում է զորակոչել նաև այն կանանց, ովքեր կամավոր հիմունքներով ցանկություն են հայտնել անցնելու շարքային կազմի պարտադիր զինվորական ծառայություն, ինչպես նաև օրենքով սահմանված հատուկ կարգավիճակ ունեցող արական սեռի քաղաքացիներին։

Պարտադիր զինվորական ծառայություն անցած քաղաքացիների զորացրումը կիրականացվի 2025 թվականի հունվարի 9-ից մինչև հունվարի 31-ը ներառյալ։

Նույն ժամկետում կզորացրվեն նաև այլընտրանքային ծառայություն անցած քաղաքացիները։

***

Սոցիալական հարցերի նախարար ՆԱրեկ Մկրտչյանն այսօր կառավարության նիստի ժամանակ հայտնեց, որ 2025 թվականի հունվար-մարտ ամիսներին Արցախից տեղահանված անձանց տրվող դրամական աջակցությունը կկազմի 50 հազար դրամ և 40+10 ծրագիրը կգործի մինչև մարտ։ «Արդեն ապրիլից մինչև հունիս ընկած ժամանակահատվածում աջակցության չափը կնվազի և կկազմի 40 հազար դրամ և այն կստանան կոնկրետ խմբեր՝ անչափահասները կամ 18 տարին լրացած, բայց բարձրագույն կրթություն ստացող քաղաքացիները, 63 տարեկանից բարձր տարիքի անձինք, կերակրողին կորցրածները և 1-ին ու 2 -րդ խմբի հաշմանդամություն ունեցողները։ Այսինքն այս սոցիալական խմբերից դուրս գտնվող մյուս անձինք մարտից այլևս դրամական աջակցություն չեն ստանա»,- ներկայացրեց նախարարը։ Իսկ հուլիսից-դեկտմբեր ընկած ժամանակահատվածում Արցախից տեղահանված կոնկրետ թիրախային խմբերը կստանան ամսական 30 հազար դրամ աջակցություն։