«Ռոսսելխոզնադզորը» հուլիսի 27-ից սահմանափակումներ կսահմանի Հայաստանից Ռուսաստան կաթնամթերքի ներմուծման վրա, ասվում է գերատեսչության կայքում տեղադրված նյութերում։ «Պարտավորեցնում եմ ապահովել Հայաստանից Ռուսաստանի Դաշնություն կաթնամթերքի ներմուծումը թույլ չտալու վերահսկողությունը 27.07.2026-ից»,- ասվում է հրապարակված փաստաթղթում, որը ստորագրվել է «Ռոսսելխոզնադզորի» ղեկավարի տեղակալ Կոնստանտին Սավենկովի կողմից։ Այն ուղարկվել է գերատեսչության տարածքային վարչությունների ղեկավարներին։ Նույն փաստաթղթում նշվում է, որ Մաքսային միության ռեեստրում «Սպայկա» ՍՊԸ-ի, «Գրին Պրոդ» ՍՊԸ-ի, «Արաքս 2» ԱԿ-ի և «Ալաշկերտ գրուպ» ՍՊԸ-ի հայկական ձեռնարկությունների կարգավիճակը հուլիսի 27-ից կփոխվի «ժամանակավորապես սահմանափակված»-ի։

Գերատեսչությունը հայտնել է, որ հուլիսի 14-ից 21-ը մասնագետները ստուգումներ են անցկացրել Հայաստանի կաթ վերամշակող ձեռնարկություններում, որոնք իրենց արտադրանքը մատակարարում էին Ռուսաստան։ Նշվում է, որ ստուգումների ընթացքում հայտնաբերվել են խախտումներ։ «Հայտնաբերված խախտումները հաշվի առնելով՝ Ռոսսելխոզնադզորը միջոցներ է ձեռնարկել՝ կանխելու Ռուսաստան առանձնապես վտանգավոր վարակների ներթափանցումը և ներքին շուկայում ոչ անվտանգ կաթնամթերքի իրացումը»,- ասվում է հաղորդագրության մեջ։

***

«Ադեկվատ» միաբանության հիմնադիր Արթուր Դանիելյանի ֆեյսբուքյան գրառումը. «Մոտ օրերս վարչակազմը մեծ ոգևորությամբ կհայտնի ձեզ, որ այսուհետ Եվրոպական շուկան բաց է հայկական կաթնամթերքի համար: Պատճառն այն է, որ այսօր ՌԴ-ն արգելեց նաև կաթնամթերքի ներմուծումը Հայաստանից: Ինչպես տեսնում ենք՝ ՌԴ վարչապետ Միշուստինի հետ հանդիպումը շատ արդյունավետ է ընթացել, դրա հետևանքով Եվրոպայում շուկա ա, որ բացվում ա հայկական ապրանքների համար: Մեր արտադրողները աննախադեպ հնարավորություն կստանան Եվրոպական շուկան հեղեղել հոլանդական ծաղկից 2 անգամ ավելի թանկ ծաղկով, չեխական ձկից 3 անգամ ավելի թանկ ձկով, գերմանականից՝ 4 անգամ ավելի թանկ կաթնամթերքով, իսպանականից 5 անգամ ավելի թանկ ծիրանով, իտալականից 6 անգամ ավելի թանկ գինով: Նույնը վերաբերվում է ջրեղենին, հյութեղենին, ջեմերին և այլն... ու քանի որ մեր ինֆեկցիոն հիվանդանոցները մանրից աշխարհի առաջատարն են դառնում սննդային թունավորումների բուժման հարցում, վստահ եմ՝ մեր ապրանքի որակը որևէ հարց չի հարուցի Եվրոպայում և ՀՀ-ում Ֆրանսիայի դեսպանատունը, որտեղ 100 հոգուց ընդամենը 20 հոգի էր թունավորվել, դա կհավաստի:
Այս հաջողության առթիվ հիրավի կարելի է մի հատ առանձին ֆեստիվառ կազմակերպել վարչաբենդի գլխավորութամբ»: