Սոցիալական ցանցերում գրանցված յուրաքանչյուր կին նախ մարդ է, հետո` էգ: Նույն տրամաբանությամբ կարելի էր ասել, որ տղամարդիկ էլ երկրորդ հերթին են արու: Բայց, ցավոք, դա չեմ կարող ասել մեծամասնության համար: Այո, ես այսօր ֆեմինիստոտ եմ, մի քիչ էլ այդ դերում լինեմ պարոնայք տղամարդիկ:
Բողոքելու եմ ձեր երբեմն անտակտ պահվածքից, որ ցուցաբերում եք այն կանանց հանդեպ, ովքեր այս, կամ այն պատճառով ամուսին չունեն: Չգիտես ինչու, շատերիդ թվում է, թե այդ կանայք հնդկացիների պես փետուրները մազերի մեջ խրած, դեմքերը մարտականորեն նախազարդած` տղամարդու որսի են ելել: Որ իրենց միակ նպատակը դուք եք: Միանգամից ասեմ, այդպես չէ: Վստահեցնում եմ, շատերիս բոլորովին էլ պետք չէ ձեր գանգամաշկը: Կանայք էլ ուղղակի մարդ են, և տարրական շփման կարիք ունեն:
Այ, ամոթ է ձեզ, որ կին, հաճախ նաև սիրուհի ունենալով համարձակվում եք սրան, նրան անպարկեշտ հարցեր տալ, կամ ակնարկներ անել: Ինձ բարեբախտաբար այդ ոլորտում այնքան էլ շատ չեն անհանգստացնում, առիթների դեպքում էլ մի գեղեցիկ արտահայտությամբ փակում եմ վավաշոտ բերանը, որ շատ չընդարձակվի: Բայց, կան ավելի ամաչկոտ ու զուսպ կանայք, ովքեր ձեր այդ լրբոտած վերաբերմունքից խուսափելով, քաշված` աշխատում են «չերևալ», որ չնկատեք իրենց գոյությունը: Ու շաաաատ վիրավորական է, երբ տեսնում եմ այդ նույն միջոցին, իրենց կողքին (հովանոցի տեղ, թե իրական) ամուսին, տղամարդ ունեցող կանանց, ովքեր ազատորեն, աջուձախ ֆլիրտ են անում: Բա նրանց ոչ մեկը չի ասո՞ւմ «այ աղջիկ ջան, քեզ մի քիչ զուսպ պահիր»: Չէ, չի ասում, որովհետև անունով «մարդատեր կնիկ» է: Տարիներ առաջ մի «բարի» հարևանուհի խոսքի մեջ «պատահաբար» հիշեցրեց, որ հայը խոսք ունի` «անմարդ կնկա փեշը վառած է»: Ուրեմն ասեմ, դուք ձե´ր կողքի փեշերին նայեք:
Անամուսին կնոջը, ով իր վշտի, հիվանդության, կամ մի այլ պատճառով ուղղակի չի կարողանում քնել, արական սեռի մեկը կարող է իրեն թույլ տալ ու գիշերվա կեսին ասել «մեկ է քնած չես հիմա, տաքսի նստի, արի, իրար հետ լուսացնենք», չհասկանալով (հուսամ), որ վիրավորում է: Բան չունեմ ասելու, տրամաբանական է, մարդիկ հանդիպում են, ծանոթանում, տարատեսակ հարաբերություններ սկսում: Դա ամեն մեկի անձնական գործն է: Ի վերջո բնական է, բայց...
Իմ կարգավիճակի մյուս կանանց համար առաջարկում, իսկ իմ դեպքում` պահանջում եմ, այսուհետ ՖԲ-ի էջը մտնելիս, քննարկումների մասնակցելիս, կամ անձնական նամակ գրելիս` չմոռանաք «շալվարը հագնել», նոր գրել, ձեզ չմրսեցնեք հանկարծ, իմ մոտ «ցուրտ ձմեռ» է այդ առումով
Հ.Գ.Տղամարդիկ ջան, ասածներս հասկանալու համար մի պահ պատկերացրեք, որ դուք անպաշտպան կին եք, մեկն, ով արժանի չէ անգամ տրանսպորտում ձեր կողքին նստելու` ափլփելով նայում է, փսլինքները գնում են, հիմա արդեն «կուտի» ձեզ, բայց որևէ պատասխանատվության պատրաստ չէ: Ուղղակի կամակոր երեխայի պես: Դուք հաստատ քիթումռութը կջարդեիք չէ: Մենք ջարդել չենք կարող, դրա համար մեկը կորում-լռում է, ես էլ երևույթի մասին բարձրաձայնում եմ!
Հ.Գ.Գ. Այս թեմայով վաղուց էի ուզում մտքերս արտահայտել, բայց հարմար առիթ չէր լինում: Հիմա էլ մի երևելի բան տեղի չի ունեցել, բայց նորից մի մանրուք նկատեցի ու ….չդիմացա այլևս...
Ալինա Դերձյանի գրառումը
Ֆեյսբուք
