ԲՀԿ խոսնակ Տիգրան Ուրիխանյանն այսօրվա խորհրդարանական հայտարությունների ժամանակ, անուղղակի վերլուծելով Երևանի Ավան վարչական շրջանում Սերժ Սարգսյանի անհաջողության պատճառները, նշել է, որ անհաջողության պատճառը եղել է քաղաքապետ Տարոն Մարգարյանի ոչ արդյունավետ գործունեությունը քաղաքապետի պաշտոնում:
Ուրիխանյանը ներկայացրել է մի քանի թվեր, որոնք այդ անարդյունավետ գործունեության ապացույցն են. Երևանի բյուջեով 81 միլիոն դրամ է հատկացված արտաքին գործուղումների համար, 344 միլիոն դրամ՝ Երևանի արտաքին լուսավորության սարքերի տեղադրման համար, և 73 միլիոն՝ դրոշների տեղադրման համար:
Ի դեպ, Տիգրան Ուրիխանյանը հիշել է անգամ քաղաքապետի հանդիպումը Վոլոչկովայի հետ: «Վոլոչկովա և նման խնդիրներ կան, արդյունքում՝ Ավանում նախագահական ընտրություններում ստացած ձայները»,- եզրափակել է ԲՀԿ խոսնակը:
Ավելացնենք, որ ՀՀԿ խորհրդի անդամ Գագիկ Մելիքյանը տարօրինակ եւ զավեշտալի է համարել Ուրիխանյանի ելույթը ու նշել.
Զավեշտ թիվ 1
ԲՀԿ խոսնակը Ազգային ժողովում խոսում է Երեւանի բյուջեի անարդյունավետ ծախսերի մասին, եւ այդ նույն պահին քաղաքապետարանում ավագանու ԲՀԿ խմբակցությունը կողմ է քվեարկում բյուջեի հաշվետվությանը: Փաստորեն, ԲՀԿ-ում տեղյակ չեն թե ինչ է անում աջ ձեռքը, ինչ է անում ձախ ձեռքը:
Զավեշտ թիվ 2
Նախագահական ընտրությունների մասին խոսում է մի մարդ, որի քաղաքական ուժը հայտնվեց խաղից դուրս վիճակում, եւ այդպես էլ մինչեւ վերջ չկողմնորոշվեց: Ու հիմա ԲՀԿ-ն համարձակվում է վերլուծություններ անե՞լ:
Զավեշտ թիվ 3
Միայն անառողջ հայ տղամարդը կարող էր այդպես արտահայտվել գեղեցկուհի Վոլոչկովայի մասին: "Սիրուն չի, Տիգրան, խելքի արի",-եզրափակել է ՀՀԿ խորհրդի անդամը:
