Վլադիմիր Կարապետյանը նշանակվել է Իտալիայում ՀՀ արտակարգ և լիազոր դեսպան
ՀՀ ԱԳՆ-ն տեղեկացնում է, որ ՀՀ նախագահի հրամանագրով Իտալիայի Հանրապետությունում Հայաստանի Հանրապետության արտակարգ և լիազոր դեսպան է նշանակվել Վլադիմիր Կարապետյանը։
«Հիմք ընդունելով վարչապետի առաջարկությունը` համաձայն Սահմանադրության 132-րդ հոդվածի 1-ին մասի 2-րդ կետի, ինչպես նաև «Դիվանագիտական ծառայության մասին» օրենքի 13-րդ հոդվածի 3-րդ մասի և 14-րդ հոդվածի. Վլադիմիր Կարապետյանին նշանակել Իտալիայի Հանրապետությունում Հայաստանի Հանրապետության արտակարգ և լիազոր դեսպան (նստավայրը՝ Հռոմ)»։
Դիտեք նաև՝
ՀՀ նախագահ Վահագն Խաչատրյանը այսօր մի շարք հրամանագրեր է ստորագրել նոր դեսպաններ նշանակելու ու հետ կանչվելու մասին։
Հասմիկ Տոլմաջյանը հետ է կանչվել Ֆրանսիայի հանրապետությունում և Մոնակոյի իշխանությունում Հայաստանի Հանրապետության արտակարգ և լիազոր դեսպանի պաշտոնից։ Մեկ այլ հրամանագրով ՀՀ նախագահը նրան նշանակել է Ժնևի Միավորված ազգերի կազմակերպության գրասենյակում և այլ միջազգային կազմակերպություններում Հայաստանի Հանրապետության մշտական ներկայացուցիչ (նստավայրը՝ Ժնև):
Ֆրանսիայում ՀՀ նոր դեսպան է նշանակվել Արման Խաչատրյանը, որը մինչ այդ Հայաստանի Հանրապետության մշտական ներկայացուցիչն էր Եվրոպայի խորհրդում։
Շվեյցարիայում ՀՀ արտակարգ և լիազոր դեսպան ու Ժնևի ՄԱԿ գրասենյակում և այլ միջազգային կազմակերպություններում ՀՀ մշտական ներկայացուցիչ Անդրանիկ Հովհաննիսյանը նույնպես հետ է կանչվել իր պաշտոնից ու նշանակվել Ավստրիայում ՀՀ արտակարգ և լիազոր դեսպան։
Արմեն Պապիկյանը հետ է կանչվել Ավստրիայի և Սլովենիայի հանրապետություններում ՀՀ արտակարգ և լիազոր դեսպանի, Եվրոպայի անվտանգության և համագործակցության կազմակերպությունում ՀՀ առաքելության ղեկավարի, ինչպես նաև Վիեննայում ՄԱԿ–ի գրասենյակում և այլ միջազգային կազմակերպություններում ՀՀ մշտական ներկայացուցչի պաշտոններից։ Նա նշանակվել է Եվրոպայի խորհրդում ՀՀ մշտական ներկայացուցիչ (նստավայրը՝ Ստրասբուրգ):
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել Asekose.am-ի խմբագրության տեսակետների հետ: Նյութերի ներքո` վիրավորական ցանկացած արտահայտություն կհեռացվի կայքից:
Tweet
