ԱԺ նախագահ Գալուստ Սահակյանն այսօր հայտարարեց, որ Տնտեսական հանձնաժողովն այսօր նիստ է գումարել և առաջարկել է ԱԺ-ին՝ Կառավարության կողմից ներկայացված Շահութահարկի մասին ՀՀ օրենքում լրացումներ և փոփոխություններ կատարելու մասին օրենքի նախագծի 2-րդ ընթերցմամբ քննարկումը կազմակերպել 48 ժամվա ընթացքում:

Երբ քվեարկության էին դրվելու «Շահութահարկի մասին» օրենքում փոփոխությունները, պատգամավորներն ասացին, որ դեմ են այս օրինագծին, և պետք է կրկին քննարկումներ անել, շտկել այն: 

ԱԺ փոխնախագահ Հերմինե Նաղդալյանին վրդովեցրեց ընդդիմադիր պատգամավորների ընդվզումը և նա սկսեց բարկացած ասել, թե հենց ընդդիմադիրներն էին խնդրի անձնավորման դեմ միշտ խոսում, մինչդեռ հիմա հենց իրենք են անձնավորում: Իսկ այդ ընթացքում Գալուստ Սահակյանի ազդանշանային համառ զգուշացումները՝ ժամանակի սպառման մասին, անտեսում էր:

ՀԱԿ խմբակցության քարտուղար Արամ Մանուկյանը հայտարարեց. «Եթե բոլոր քաղաքական ուժերն ասում են դա հապշտապ, «թըփշըփ» որոշում է, ապա ականջալուր ինչո՞ւ չեք լինում, չի կարելի նման «թըփշըփությամբ» օրինագիծ բերել ու ընդունել: Դահլիճն ասում է՝ արգումենտներ ունենք, համբերեք դա բերենք ու քննարկենք»:

Հրանտ Բագրատյանն էլ դիմելով Հերմինե Նաղդալյանին՝ ասաց. «Մենք հունվարին արդեն ունենք 35 տոկոս արտահանման անկում: Տիկին Նաղդալյան, ես Ձեզ շատ եմ հարգում, բայց կամ փոխենք ձեզ, կամ տնտեսագիտությունը.այդտեղ երկու ելք կա: Այյն, ինչ դուք ասում եք, հակասում է տնտեսագիտությանը: Դուք տնտեսագիտության պրոֆեսոր ե՞ք»։

Նաղդալյանը տեղից որոշեց արձագանքել: Դա արժանացավ Գալուստ Սահակյանի կշտամբալից հայացքին. ԱԺ նախագահն անջատեց Նաղդալյանի բարձրախոսն՝ ասելով, թե այս ինչ է անում: Սա ծիծաղ առաջացրեց դահլիճում:

Օրինագիծն ընդունվեց 64 կողմ, 5 դեմ, 1 ձեռնպահ ձայների հարաբերակցությամբ: