Հուլիսի 26-ին ժամը 19:30-ի սահմաններում արտակարգ պատահար է գրանցվել Գյումրիի Գարեգին Նժդեհ հրապարակի 1 Գ շենքում: 4-րդ հարկում գտնվող թիվ 24 բնակարանի պատուհանից ընկել է մեկ ու կես տարեկան Չարլի Դերենիկի Դոդդին:

Փոքրիկը սենյակում է եղել քրոջ հետ, առանց ծնողների հսկողության: Մայրը սենյակ մտել է միայն այն ժամանակ,երբ երեխան արդեն ներքեւում է եղել:
Շտապ օգնության մեքենայով փոքրիկին տեղափոխել են Գյումրիի ՙՄոր եւ մանկան Ավստրիական հիվանդանոց: Բժիշկները ցուցաբերել են առաջին բուժօգնություն, կատարել համապատասխան հետազոտություններ, համաձայն որոնց մեկ ու կես տարեկան Չարլին մարմնական լուրջ վնասվածքներ չի ստացել, տղայի մարմնին ընդամենը քերծվածքներ են: Այդուհանդերձ ծնողները որոշել են փոքրիկին բժիշկների հսկողության տակ թողնել մայրաքաղաքում, որտեղ եւս մեկ անգամ լրացուցիչ հետազոտություններ կկատարվեն:
Նշենք, որ Դոդդիների ընտանիքը Կանադայի քաղաքացի է եւ մոտ մեկ ու կես ամիս է, ինչ հյուրընկալվել են Գյումրիում:
Տեսանյութըˋ «Շանթ» ՀԸ