«Ազատություն» ռադիոկայանի հետ զրույցում «Ժառանգություն» կուսակցության նախագահ Րաֆֆի Հովհաննիսյանը հայտնեց, որ իրենք վերադառնում են Ազատության հրապարակ. «Մեզ մոտ չկա ոչ միայն սադրանք, այլ կատարյալ սթափություն է: Անսթափները նրանք են, ովքեր անօրեն հրամաններ են տալիս, և քաղաքացիների գույքի վրա, ազատ տեղաշարժի վրա՝ վախից դրդված՝ սահմանափակում և սահմանադրական խախտում են իրականցնում: Ի՞նչ է նշանակում վարորդներ վախեցնել», - ասաց «Նոր Հայաստան» շարժմանը միացած «Ժառանգության» առաջնորդ Րաֆֆի Հովհաննիսյանը՝ արձագանքելով ոստիկանության տարածած հաղորդագրությանը:
«Այդ հաղորդագրությունը ինքնին սադրանք է, սադրիչ է: Իրենք միտումնավոր ապատեղեկացնում են ժողովրդին: Այստեղ կա կարգապահություն, և ով որ սադրանք է ասում, սադրիչ է: Ես հերքում եմ դա և ասում եմ, որ թող մեզ հետ սադրանքի լեզվով չխոսեն»:
«Հետադարձ կոչ եմ անում պարոն Գասպարյանին, որ ամեն մեկը թող իր գործի մեջ լինի: Դուք ևս սթափ եղեք, ձեր ղեկավարությունը սթափ լինի: Մենք սթափ ենք: Այո՛, փոքր երկիր ենք, բայց մի սպառնացեք մեզ և սթափության դասեր չտաք: Սա իրավատեր ժողովուրդ է: Դուք դադարեցրեք կուսակցապետության ձեր պաշտպանությունը», - ասաց Րաֆֆի Հովհաննիսյանը:
Մանրամասները՝ սկզբնաղբյուր կայքում
