Օրերս Russia Today-ի գլխավոր խմբագիր Մարգարիտա Սիմոնյանը «Ռոսիա 24» եթերում հեռարձակվող «Կարևոր անձ» («Важная персона») հաղորդման հյուրն էր: Հաղորդավարի այն հարցին` արդյո՞ք հիշում է իր հայկական արմատների մասին և այդ էթնոսի կրո՞ղն է, Մարգարիտա Սիմոնյանը պատասխանել է հետևյալ ձևով. «Ես անկասկած ռուսաստանցի եմ, ռուսերենը իմ մայրենի լեզուն է, իսկ Ռուսաստանը՝ հայրենիքը: Բայց ես, անկասկած, զտարյուն հայուհի եմ: Ճիշտ է, հայերեն չեմ խոսում, փոխարենը՝ երեխաներս հայերենին տիրապետում են»:
Մարգարիտան նշել է նաև, որ նախքան Տիգրան Քեսոյանի հետ ամուսնանալը Հայաստանում միայն մեկ անգամ էր եղել` Պուտինի այցի ժամանակ` կատակելով, որ բացի Պուտինից, ոչինչ չէր տեսել: Միաժամանակ, Մարգարիտան նշել է, որ այս տարվա մայիս ամսին Տիգրան Քեսոյանը և նրա հայ ընկերները, այդ թվում` իրենց երեխաների կնքահայր Արթուր Ջանիբեկյանը, Հայաստան ֆենոմենալ այցելություն էին կազմակերպել:
Լրագրողը անդրադարձել է նաև այն հարցին` արդյո՞ք իրեն հաճախ է «բաժին հասել» իր հայկական ծագման համար.
«1990-ականներին Կրասնոդարը շատ խառը շրջան էր: Երկրամասը հեղեղված էր գաղթականներով՝ առաջին հերթին Հայաստանից. այնտեղ պատերազմ էր, Ղարաբաղի խնդիրը կար, շրջափակում էր: Ինչ-որ պահի Կրասնոդարում նույնիսկ հակական ջարդեր եղան: Դրանք հրահրել էին Գորբաչովի օրոք իշխանությունները: Մի գիշեր հավաքեցին զորակոչի տարիքի ռուս տղամարդկանց եւ ասացին, որ գնալու են պարզաբանման ղարաբաղյան հակամարտության հարցով: Եվ հաջորդ օրը սկսվեց՝ խփում էին ապակիներին, կոտրում, մենք թաքնվել էինք: Դպրոցում մեզ ասացին ինչ-որ ժամանակ դուրս չգալ»:
