Հեղինակավոր Vogue ամսագրի ռուսական տարբերակը ներկայացրել է «Victoria’s Secret»-ի «հրեշտակ»-ներից մեկի` հայտնի մոդել Ստելլա Մաքվելի հայաստանյան այցելության մանրամասները և նոր լուսանկարները:
«Ժամանակակից Հայաստանի հրաշալի վանքերը, կինոմատոգրաֆիայի համար տեսարանները և ազգային հերոսները Vogue-ի անձնակազմի աչքերով»,- ահա այսպես են սկսում իրենց ճանապարհորդության մասին պատմությունը:
Ըստ ամսագրի` իրենց հետ մշտապես համագործակցող Դավիդ Մուշեղայնը (Դավիդն, ի դեպ, ինքն է իր ազգանվան վերջավորությունը նման կերպ գրում` Մուշեղայն, ոչ թե Մուշեղյան) մի քանի ամիս առաջ այցելել էր Հայաստան և տպավորված հեռացել պատմական հայրենիքից: Այդ պատճառով էլ, երբ իրենք առաջարկել էին Դավիդին ռուսական Vogue-ի համար էթնիկ հագուստներ նկարահանել, նա խորհուրդ է տվել այցելել Երևան: Մուշեղայնի հետ էլ Հայաստան է այցելել հայտնի մոդել Ստելլա Մաքվելը: Վերջիններս երեք օր են անցկացրել Հայաստանում:
«Հայաստանն առաջին հերթին հայտնի է իր վանքերով և դրանց մասին պատմող առասպելներով: Յուրաքանչյուր վանքից բացվում է հրաշալի տեսարան»,- այսպես են ներկայացրել Հայաստանի վանքերը` տվյալ պարագայում մատնանշելով Խոր Վիրապը:
Ռուսական Vogue-ի անձնակազմն իրենց այցելության ժամանակ եղել են նաև Գառնիում, Սևանում, ինչպես նաև հանդիպել և լուսանկարվել են ազգագրագետ, նկարչուհի Լուսիկ Ագուլեցու և նշանավոր դուդուկահար Ջիվան Գասպարյանի հետ: Վերջինիս մասին նշել են, որ նա Երևանի գլխավոր աստղն է, ով նաև հոլիվուդյան «Գլադիատոր» ֆիլմի երաժշտության հեղինակն է, ինչպես նաև «Ոսկե գլոբուսի» դափնեկիր է: Հայտնի դուդուկահարը նվագել է օտարերկրացի հյուրերի համար, ինչպես նաև հրավիրել է իր մոսկովյան մենահամերգին:
Ամսագիրը նաև նշել է, որ իրենց անձնակազմը Երևանում իջևանել էր «Armenia marriott hotel»-ում, որտեղ իրենց հայաստանյան այցելության ժամանակին հյուրընկալվել էին նաև Քիմ Քարդաշյանը և Քանյե Ուեսթը:
Ռուսական Vogue-ի խորհրդի համաձայն` զբոսաշրջիկները Հայաստանից պետք է իրենց հետ տանեն համեմունքներ, բաստուրմա, վինտաժային զարդեր և նռան տեսք ունեցող կույժեր:
Եզրափակելով իրենց ճանապարհորդության մասին պատմությունը` նրանք հավելել են, որ Ստելլա Մաքվելն օդանավակայանի ճանապարհին խնդրել է կանգնեցնել մեքենան` կակաչներ հավաքելու նպատակով:
Հիշեցնենք, որ Ստելլա Մաքվելի ֆոտոշարքերից մեկն իրականացվել է Asekose.am-ի գրասենյակի երկրորդ հարկում գտնվող «Ժան Պոլ էքզիստենցիալ սրճարան»-ում: