Երեկ համացանցում հայտնվեց մոդել Շուշան Երիցյանի արտաքին տեսքին վերաբերող հերթական բացասական հրապարակումը, որը վերնագրված էր հետևյալ կերպ. «Ու՞մ փողերով է Շուշան Երիցյանը ձևափոխում իր մարմնի ամեն միլիմետրը»: Տվյալ նյութի հեղինակը նշում է, որ մոդելն իր գործունեության մեկնարկից մինչ այսօր դիմել է բազմաթիվ պլաստիկ վիրահատությունների՝ չթողնելով առանց շտկման մարմնի որևէ հատված: Այս ամենի վերաբերյալ մեկնաբանություն ստանալու նպատակով Asekose.am-ը կապ հաստատեց Շուշանի հետ, ով ասաց հետևյալը.
«Ես ասելու ոչինչ չունեմ, կասեմ ընդամենը մեկ բան. շնորհակալ եմ Աստծուն, որ ինձ այնպես է ստեղծել, որ մարդիկ իմ բնական մարմինը չեն կարողանում տարբերել արհեստականից: Իմ մարմնի վրա ամեն ինչ բնական է, քիթս է միայն վիրահատած: Եթե մարդկանց այդքան հետաքրքիր է, նույնիսկ կարող ենք բժշկական հետազոտություն անցկացնել, ինչից հետո նմանատիպ խոսակցությունները վերջապես կդադարեն: Չգիտես ինչու՝ տարիներ շարունակ մարդկանց հետաքրքրում է իմ մարմնի որոշ մասերը»,- ասաց Շուշան Երիցյանը:
Անդրադառնալով հրապարակման հեղինակի այն դիտարկմանը, թե որքան էլ որ Շուշան Երիցյանը պնդում է, որ վիրահատությունների չի ենթարկվել, բայց պարբերաբար համացանցում հայտնված իր լուսանկարները համեմատելիս փոփոխություններն ակնհայտ են, Շուշան Երիցյանը պատասխանեց.
«Գիտեք, ցանկացած մարդու, օրինակ` 18 և 24 տարեկան հասակում արված լուսանկարները համեմատելիս, փոփոխություններ լինելու են, եթե անգամ այդ անձնավորությունը ոչ մի վիրահատական միջամտության չի դիմել: Տարիներ առաջ արված իմ լուսանկարները համեմատել այսօրվա իմ լուսանկարների հետ, դա անգրագիտության վերջին գագաթնակետն է: Ինչպես կարելի է մարդու դեռ ոչ հասունացած տարիքի լուսանկարը համեմատել հասուն տարիքում արված լուսանկարի հետ և ասել, որ փոփոխություն կա: Բնական է, որ այդ փոփոխությունը պետք է լինի»,- նշեց մոդելը՝ հավելելով, որ ինքն անընդհատ հետևում է իր արտաքին տեսքին, այցելում է մարզասրահ և այլն:
Ինչ վերաբերում է սիլիկոնային միջամտություններին՝ Շուշանն ասաց, որ նման բաների երբեք չի դիմել.
«Նորից եմ ասում, շնորհակալ եմ Աստծուն և իմ ծնողներին, որ ես նման արտաքին ունեմ»,- ավելացրեց Շուշան Երիցյանը:
Անդրադառնալով իր գործունեությանը և ֆինանսական միջոցներին, որոնց մասին ևս հիշատակվել էր հրապարակման մեջ, Շուշանը հստակեցրեց.
«Ասեմ, որ իմ կարիերան գնալով ծաղկում է ապրում: Ես շատ գոհ եմ իմ կյանքից և գոհ եմ ոչ միայն ելնելով ֆինանսական կողմից,այլ առհասարակ: Նորից եմ կրկնում, իմ կյանքը շատ լավ է, թող ոչ ոք չանհանգստանա»,- ասաց Շուշան Երիցյանը:
Մեզ հետ զրույցում Շուշանը հայտնեց նաև, որ համոզված է այն բանում, որ տվյալ հրապարակումը պատվիրված է: Ավելին, մոդելը նշեց, որ նույնիսկ տեղյակ է, թե ում կողմից է դա պատվիրված.
«Այս պահին չեմ ցանկանում կոնկրետ նշել նրա անունը, պարզապես կասեմ, որ նա այն մարդն է, ում հանդեպ այս կյանքում ես, կարելի է ասել, բազմաթիվ լավ, դրական քայլեր եմ արել: Ուղղակի հասկացա, որ մարդիկ ուրացող են»,- մանրամասնեց Շուշան Երիցյանը:
Հարցին՝ արդյոք ինքը պատրաստվում է որևէ միջոց ձեռնարկել տվյալ անձնավորությանը պատժելու համար, Շուշանը պատասխանեց.
«Վստահ եմ, որ այսօրվանից հետո նա այլևս երբեք որևէ կեղծ էջով ոչ մի պատվիրված նյութ, ոչ մի մեկնաբանություն թույլ չի տա իրեն անել: Եվ այս ամենի հետ կապված կցանկանամ մեջբերել հայտնի ասացվածքը. «Մի փորձիր կծել նրան, ով կարող է քեզ կուլ տալ»»,- Asekose.am-ի հետ զրույցում իր խոսքը եզրափակեց մոդել, դերասանուհի Շուշան Երիցյանը:
Հեղինակ՝ Սաթենիկ Խաչատրյան
