ՀՀ ֆուտբոլի ազգային հավաքականի գլխավոր մարզիչ Վարդան Մինասյանը այսօր կայացած մամուլի ասուլի ժամանակ ասել է, որ Յուրա Մովսիսյանի ներկայությունը Ավստրիայում իրենց ուսումնամարզական հավաքի ընթացքում թիմի վրա դրական մեծ ազդեցություն է ունեցել:
Թեեւ նա չէր կարող մարզվել վնասվածքի պատճառով, բայց նպաստել է թիմում բարձր տրամադրությանն ու մթնոլորտին:
Լրագրողների մոտ հարց առաջացավ՝ արդյո՞ք հնարավոր է, որ դա հաշվի առնելով՝ Մինասյանը փոխի ավագին:
Վերջինս բացասական պատասխան տվեց:
«Ավագը Հենրիխ Մխիթարյանն է, ու միանշանակ այդպես էլ մնալու է, ոչ մի փոփոխություն չի լինի, որովհետեւ ես նրա գործողություններից շատ գոհ եմ: Վերադառնամ վիճակագրությանը. նախորդ խաղերի համեմատ նրա բոլոր ցուցանիշները շատ բարձր են:
Այդ լիդեր ասվածը տարբեր ձեւ է լինում. կա խաղով լիդեր, կա հանդերձարանում լիդեր: Այն, ինչ նա ցույց է տալիս, ու այն, ինչ ես տեսա վերջին 2 խաղում, ինձ լրիվ բավարար է»,- ասաց նա:
