Արարատի մարզի Այգեզարդ գյուղի Չկալովի փողոցն այսուհետ կրելու է տնային կալանքի ներքո գտնվող՝ ռուսաստանաբնակ հայ գործարար Լևոն Հայրապետյանի անունը: Առաջարկը պատկանում է Այգեզարդի ավագանու անդամ Գարիկ Բադալյանին.
«Չկալովը գյուղի հենց առաջին փողոցն է: Մեծ շռայլություն է այդ անունով փողոց ունենալը: Չկալովը սովետական հերոս, օդաչու է եղել և չգիտեմ, թե ինչ է արել Հայաստանի համար: Իսկ Լևոն Հայրապետյանը մեր ժամանակի մեծ հայերից մեկն է և այս քայլով մեր աջակցությունն ենք հայտնում նրան»,-Asekose.am-ի թղթակցի հետ զրույցում ասաց Գարիկ Բադալյանը:
Նրա խոսքով՝ այսօր անտարբերության մթնոլորտ կա, իսկ այդ փողոցի բնակիչները ստանալով անձնագրերը՝ կսկսեն հետաքրքրվել, թե ո՞վ է նա:
«Կուսումնասիրեն գործերը և դա վարակիչ կլինի: Իրենք էլ կփորձեն ինչ-որ կերպ օգտակար լինել համայնքին, Հայրենիքին: Գոնե մեկ ծառ կտնկեն»,-հույս հայտնեց Գարիկ Բադալյանը:
Եվ, քանի որ այս փոփոխությունը շատերի զարմանքն է հարուցել և նրանց հուզում է հարցը, թե Լևոն Հայրապետյանն ի՞նչ է արել Հայաստանի համար, ավագանու անդամը նկատում է.
«Ես չեմ առանձնացնում Հայաստանն ու Արցախը: Արցախը ՀՀ մարզերից մեկն է, տարբերություն չկա: Իսկ Լևոն Հայրապետյանը հայրենասեր մարդ է և կապ չունի, թե որտեղ է ներդրումներ կատարել»:
Խոսելով համայնքում կատարվող այլ աշխատանքներից՝ Գարիկ Բադալյանը նշեց, որ բարեկարգվել են մի շարք փողոցներ, երիտասարդության և սպորտի կենտրոն է կառուցվում, տարածք է հատկացվել եկեղեցի և հանգստյան գոտի կառուցելու համար.
«Ցանկանում ենք Թուրքիայի տարածքում ավերված հայկական եկեղեցու մակետ վերցնել և նույն անունով եկեղեցի կառուցել»,-տեղեկացրեց Այգեզարդի ավագանու անդամը:
Հիշեցնենք, որ հուլիսի 24-ին Ռուսաստանի Դաշնության Քննչական կոմիտեն «Բաշնեֆտ» ընկերության բաժնետոմսերը հափշտակելու եւ անօրինական ճանապարհով ստացված գումարները յուրացնելու մեջ կասկածվող հայ գործարար Լեւոն Հայրապետյանին մեղադրանքներ է առաջադրել ՌԴ քրեական օրենսգրքի 160-րդ (յուրացում կամ վատնում) եւ 174-րդ (անօրինական ճանապարհով ձեռք բերված միջոցների լվացում) հոդվածներով: Սեպտեմբերի 12-ին Լեւոն Հայրապետյանին եւս մեկ մեղադրանք է առաջադրվել մեքենայության հոդվածով: Հոկտեմբերի 3-ին Մոսկվայի Բասմանի դատարանը փոխել է «Բաշնեֆտի» գործի ֆիգուրանտ, հայտնի հայ գործարար Լեւոն Հայրապետյանի խափանման միջոցը՝ կալանավորումը փոխարինելով տնային կալանքով։
Անի Կարապետյան
