Asekose.am-ին հայտնի է դարձել, որ իշխանական թևերում լուրջ քննարկվում է կառավարության մի քանի անդամի դեմ «պատվեր»-ով նյութերի հրապարակման հնարավոր մեխանիզմը:
Ուշագրավն այն է, որ կասկածամիտ նախարարներից ոմանք կարծում են, թե այդ նյութերի հետևում կանգնած է իրենց գործընկերներից մեկը կամ վերջինիս աշխատակիցներից, ով, գուցե, ինքնագլուխ է գործում:
Կասկածամիտների այս զգուշավորությունն, ըստ Asekose.am-ի զրուցակցի, ով ցանկացավ չհրապարակել անունը, հասկանալի է, քանի որ, նրա խոսքով, կառավարության անդամների մոտ ներքին պայմանավորվածություն կա` «չպահել» որևէ լրատվական կայք ու հնարավորին զերծ մնալ ` նույնիսկ մտերիմ լրագրողների հետ կառավարության «ներքին խոհանոցը» քննարկելու գայթակղությունից:
Չնայած սրան` եթե առաջ ԶԼՄ-ների ներկայացուցիչների շրջանում շոշափվում էր այս կամ այն կայքի «պատկանելության» խնդիրը, ինչն անմիջապես հերքվում էր , այժմ առավել հաճախ «հետաքննվում» է, թե որ հրապարակման հետևում ում «ականջներն են երևում»:
Մեր զրուցակիցը նաև նշեց, թե չի բացառվում, որ այս խնդրով իրենց մտահոգությունը որոշ պաշտոնյաներ առաջիկայում նաև բարձրաձայնեն կամ էլ դիմեն Բաղրամյան-26: