Կենսաբան Գագիկ Կարապետյանը և տեխնիկական գիտությունների թեկնածու, ապրանքագիտության ամբիոնի դոցենտ Վարդուհի Մելիքյանը այսօր՝ լրագրողների հետ հանդիպման ժամանակ անդրադարձան ֆոլաթթվով ալյուրի հարստացմանը, հետևանքներին ու վտանգներին:
Վարդուհի Մելիքյանը չի հասկանում, թե ինչու ենք անպայման ցանկանում կիրառել դրսի փորձը: Նա նկատում է՝ չէ՞ որ մենք ավելի լավն ունենք: Այն, ինչը հազարամյակներ շարունակ օգնել է մեզ:
«Պայմանավորված աշխարհագրական դիրքով՝ մենք օգտագործում ենք բազմաթիվ սննդամթերքներ, որոնք պարունակում են երկաթ, ֆոլատ և այլն: Այս սննդամթերքները բավարարում են մեր օրգանիզմի պահանջը: Բոլոր սննդամթերքները երկաթի լավ աղբյուր են, ինչո՞ւ պետք է միայն հաց օգտագործենք: Օրը 15 միլիգրամ է պահանջվում: Երկաթով հարուստ են լոբին, մաղադանոսը, չորացրած մասուրը, կաթնաշոռը, տավարի միսը, երիկամները»,-ասաց Վարդուհի Մելիքյանը:
Նրա խոսքով Առողջապահության նախարարությունը պետք է փորձարկումներ կատարի, թե մեր սննդամթերքների մեջ որքանով է պակաս այս ամենը, փորձարկեին, թե հացի մեջ ինչքան կարելի է ավելացնել, քանակի ավելացումը ինչպիսի փոփոխություն կարող է առաջ բերել և այլն: Փորձարկեին նաև հիվանդների համար:
Կենսաբան Գագիկ Կարապետյանն էլ անդրադարձավ այն հայտարարությանը, թե թերսնվում է ժողովուրդը, ասելով.
«Եթե դուք կարծում եք, որ թերսնվող մարդու մոտ միայն երկաթի ու ֆոլատի դեֆիցիտ է, ապա սխալվում եք»:
Անդրադառնալով այն հանգամանքին, որ ֆոլաթթուն քաղցկեղ է առաջացնում, Գագիկ Կարապետյանը մեջբերեց ԵՄ սննդի անվտանգության պետական տեսչության եզրակացությունը, որում ասվում է.
«Բավարար ապացույցներ չկան պնդելու, որ ֆոլաթթուն քաղցկեղ է առաջացնում, բայց ժխտել անհնար է»: Իսկ քաղցկեղին նպաստելն արդեն հաստատված փաստ է: 15 տարուց ավել է հակաֆոլատային դեղեր են օգտագործում բժիշկները՝ քիմիաթերապիայի ժամանակ: Դրանով արյան մեջ ֆոլատի մակարդակն են իջեցնում»,-նկատեց կենսաբանը:
Գագիկ Կարապետյանը պնդում է՝ սա բազմաթիվ առողջական ռիսկեր է պարունակում:
«Ասում են՝ պատրաստվում են 1 կիլոգրամին 1.3 միլիգրամ ֆոլաթթու ավելացնել: Այսինք՝ 400 գրամ հաց ուտելիս մարդիկ կստանան հղի կնոջը 3 ամսում խորհուրդ տրվող չափաբաժինը, ինչը ընդունելու ենք ամեն օր և ամբողջ կյանքի ընթացքում: Միակ բացատրությունն այն է, որ նախարարությունը ողջ բնակչությանը հղի կնոջ տեղ է դրել»:
Անի Կարապետյան