«Արմենիա» միջազգային օդանավակայաններ» ՓԲԸ (Կոնցեսիոներ) առաջարկած՝ «Զվարթնոց» օդանավակայանի առաջիկա հինգ տարիների զարգացման ծրագրի շրջանակներում հին ուղևորային համալիրի քանդման հետ կապված հարցը բացասաբար ընդունվեց թե՛ Հայաստանի հանրության և թե՛ ճարտարապետների կողմից: Հարցը իր ենթահանձնաժողովներում քննարկեց Հանրային խորհուրդը՝ ներգրավելով մասնագետների, Հայաստանի ճարտարապետների միության ներկայացուցիչների:
ՀԽ ենթահանձնաժողովները, գնահատելով Կոնցեսիոների ձգտումը՝ մասնակիորեն պահպանել կառույցը, բացասական կարծիք հայտնեցին նոր տարբերակի վերաբերյալ՝ նշելով, որ հին մասնաշենքի ամբողջական պահպանման համար կան չքննարկված տարբերակներ:
«Բոլոր երկրներում կան կառույցներ, որոնք կարևորագույն մասնիկ են համարվում ճարտարապետության մեջ և անտեսել դրանք, այս դեպքում՝ «Զվարթնոց» օդանավակայանի հին մասնաշենքը, չի կարելի: Պետք է գտնել այնպիսի լուծում, որը կնպաստի կառույցի պահպանմանը»,-այսօր՝ լրագրողների հետ հանդիպման ժամանակ ասաց Ճարտարապետների միության նախագահ Մկրտիչ Մինասյանը:
Նրա խոսքով՝ ճարտարապետներն առաջարկել են լուծման տարբեր ճանապարհներ.
«Մենք հույս ունենք, որ կոնցեսիոներն անպայման կաշխատի մեր ճարտարապետների հետ: Նա սկզբում ուզում էր քանդել ամբողջ շենքը, որոշ հանդիպումներից հետո հանգեցին այն եզրակացության, որ կարելի է միայն շենքի միջուկը պահել՝ բարձրադիր մասով՝ աշտարակով, իսկ մենք ասում ենք, որ շենքը կարելի է ամբողջովին պահպանել՝ կատարելով ամրացման մի քանի աշխատանքներ»,-նկատեց Մկրտիչ Մինասյանը:
Մկրտիչ Մինասյանի փոխանցմամբ՝ «Զվարթնոց»–ի ամրակցման համար անհրաժեշտ է մոտ 10 միլիոն դոլար։
Անի Կարապետյան