Արդեն տեղեկացրել ենք, որ Հայաստան24.com կայքի տրամադրության տակ է հայտնվել «ՍԱՍ» գրուպում տեղի ունեցած նախընտրական ժողովներից մեկի ձայնագրությունը, որում լսվում է, թե ինչպես է ընկերության ղեկավարներից մեկը աշխատակիցներին հորդորում աշխատել Արտակ Սարգսյանի համար, մտերիմներին, հարազատներին ուղղորդել քվեարկել նրա օգտին՝այլապես կկանգնեն աշխատանքը կորցնելու վտանգի առջեւ:
Ընդ որում ձայնագրությունում խոսող այդ անձը Արտակ Սարգսյանի օգտին աշխատելը ներկայացնում է որպես թասիբի հարց, որպես անձնական գործ՝ հիշեցնելով, որ մարդուն աշխատանքով ապահովելը արդեն մեծ գործ է: Ժողովի ընթացքում «ՍԱՍ»-ի ներկայացուցիչը անուն առ անուն ընթերցում է ինչպես այն անձանց անունները, որոնք Արտակ Սարգսյանի օգտին քվեարկողների ցուցակ չեն բերել, այնպես էլ մեծ թվով ձայներ բերածներինը:
Օրինակ, ընթերցելով Նաիրա Սարգսյանի անունը՝ նա հարցնում է, թե ինչո՞ւ անուն չի բերել: Նաիրան ասում է, որ բարեկամ չունի Արաբկիրում: Ի պատասխան «ՍԱՍ»-ի ներկայացուցիչը նրանից հետաքրքրվում է, թե այդ դեպքում ինչպե՞ս է գործի ընդունվել, ապա ընդգծում՝ «Լավ չի քո վիճակը, ասեմ»: Այս ընթացքում նա շարունակ նաեւ ակնարկում է, որ ում անվան դիմաց 0 է գրված՝ այդ անձին դիտարկելու են որպես իրենց դեմ մարդ եւ համապատասխանաբար վերաբերվելու են նրան: Իսկ ամենաշատ ձայն բերածներին խոստանում է պաշտոնի բարձրացում եւ Փարիզ ուղեւորություն:
Հայկական Ժամանակ թերթի կայքը ներկայացրել է ձայնագրությունում առկա ելույթի որոշ հատվածների սղագրությունը:
Դրանց կարող եք ծանոթանալ ստորև.
«Ուրեմն Արամ, էս քո ցանկը, Swet»-ի աշխատողները 200 հոգով, դու բերել ես 53 ձայն: Ուրեմն քո հարցը, մանավանդ քո հարցը էն տիպի ա դրված, որ եթե էս պատկերը 3-4 օրվա մեջ նույնը եղավ, պրոստո քեզ բարի ճանապարհ ենք ասում, որովհետեւ սա վերաբերմունք ա, ոչ թե կարենալ-չկարենալու հարց, եթե դու էդ ձեւ ես վերաբերվում մեզ, ուրեմն մենք 5 անգամ վատ կվերաբերվենք քեզ: Սա պատկեր չի»,- մեկ այլ աշխատակցի ասում է նա:
«Անահիտ Բալյանն ո՞վ ա, դու է՞լ չունես ծանոթ: Քաղաքում ես ապրում, բա էդ քո ծանոթները չունե՞ն ծանոթներ, ընկերներ, խի՞ չես ուզում բերես: Որովհետեւ էսօր մենք Արաբկիրում, Աջափնյակում ունենք աջակիցներ, ովքեր մեզ օգնում են, ու չեմ կարծում՝ էդ նույն գործը չկարանան անել, ինչ դուք եք անում: Եթե դուք էդ ձեւի եք մոտենում, մենք էլ էն մարդկանց կընդունենք աշխատանքի, ովքեր կկարողանան մեզ օգնել: Այ էս զրոն քո անունի դիմաց գրված է, մի կարծի, որ էսի անցավ-գնաց: Տենց չի, ամեն ինչ փոխադարձ է էս կյանքում»:
«Անուշ Ադամյան: Ըհը, օրինակ Անուշ Ադամյանը բերել է 14 ձայն, եկեք ծափահարենք Անուշին...Էս դուրներդ չեկա՞վ, որ ծափ չեք տալիս, էդ ո՞նց ա որ Անուշը կարում ա բերի, բայց ստեղ ասենք օրինակ Աշոտ Աղախանյան, խի՞ չես բերել ձայն, չես ուզում, հա՞»:
«Աննա Ավագյան: Էդ քո կարծիքով որ շլյապա ես դրել, պետք ա չտենանք հա՞, որ 0 ձայն ես բերել, հը՞, խի՞ չես բերել ձայն... (Դահլիճում գտնվողներից մեկն ասում է, որ Անուշն իր դուստրն է, ինքն է բերել ցուցակ): Հա՞, չէ, աղջիկդ ուրեմն կարա շլյապա դնի: Ըհը, տես, իրա հայրը 21 ձայն բերել ա: Այսինքն էդ ո՞նց ա՝ մարդը բերում ա 21 ձայն, Վոլոդյա Դանիելյանը, Արամ Գեւորգյանը՝ 0 ձայներ են: Ովքե՞ր են Վոլոդյան, Արամը: Ասա Վոլոդյա, ամոթ չե՞ս անում, քանի՞ տարեկան ես...19-ը՞, էդ ա անչափահաս չես, ունես ընկերներ, բարեկամներ: Արաբկիրում ունես ընկեր, ինչի՞ չես բերում իրա ձայնը, թե՞ ընդդիմությունից ա ընկերդ»:
«Արամ Խաչատրյան: Արա՞մ, ամոթ չե՞ս անում, արա, զրո ա քո թվերը: Հիմա ի՞նչ անենք, չխմե՞նք էդ քո սոկը: Հիմա էսօր գնում ես տուն, տնեցիքին հավաքում ես, հորքուր, մորքուր, քեռի, ասում ես էսի իմ խնդիրն է, ձեր մոտիկներին հիշեք, օգնեք էս հարցում: Եթե ասես չունեմ, ուրեմն սուտ ես ասում, ես կգտնեմ քո ծանոթներին Արաբկիրում, էդ վախտ ձեռքիցս չես պրծնի: 3 օր ժամանակ»:
«Գարիկ Բաբայան: Հազար ամոթ քեզ, Գարիկ: Հազար ամոթ, բա սազո՞ւմ ա քո նման տղուն սենց 0, բա դու զրոյով տղա՞ ես»:
«Իրինա Նազարյան: 44 ձայն: Ես խոստանում եմ քո պաշտոնը կբարձրացնենք»:
«Գոհար Ավետիսյան: Հը՞, դե՞մ ես մեզ, Գոհար...Էտի ամենահեշտ պատասխանն ա՝ ռայոնից եմ: Ոչինչ, կապ չունի, կէթաս, վիզ կդնես, կբերես, կէթաս կհամոզես, ծանոթներ կգտնես, ընկերներ կգտես, եթե մենք 100 հոգու մեջից քեզ ենք ընտրել գործի, ուրեմն ինչ -որ պատասխանատվությոն պիտի վերցնես»:
«Սիրանույշ Թումասյան: Յա, մազերդ տենց սիրուն ներկել ես, զուգվել-զարդարվել ես, գիտես պտի էսօր մեծարման երեկո՞անենք, հա՞ 0 ձայներիդ համար: Ամոթ չե՞ս անում, Սիրանույշ: Ամոթ ա, չէ՞: Որտե՞ղ ես ապրում, Թաիրո՞վ: Կապ չունի, տեսա՞ք մարդը ռայոնից 15 ձայն ա բերել»:
Հիշեցնենք, որ Արտակ Սարգսյանը ռեյտինգային ընտրակարգով առաջադրվել էր թիվ 2 ընտրատարածքում եւ ապրիլի 2-ին կայացած խորհրդարանական ընտրություններում հավաքելով 12 հազար 27 ձայն՝ վերընտրվել:
Հիշեցնենք, որ Արտակ Սարգսյանը ռեյտինգային ընտրակարգով առաջադրվել էր թիվ 2 ընտրատարածքում եւ ապրիլի 2-ին կայացած խորհրդարանական ընտրություններում հավաքելով 12 հազար 27 ձայն՝ վերընտրվել:
