Վայոց Ձորի Եղեգիս, Մալիշկա, Հերհեր, Գլաձոր գետերն ու շրջակա միջավայրը վտանգված են.«Վայք մետալ» ընկերությունը նոր հանքավայրեր է ցանկանում շահագործել։
«Այն կապարի և ցինկի հանքավայր է: Խոսք է գնում 106.000 տոննա հանքաքար վերամշակելու մասին: Համաձայն ուսումնասիրությունների՝ այնտեղ 130-135 հանքային մարմիններ կան: Ծվատելու են ամբողջ Թեք սարը: Շահագործումից ամբողջ ջրային համակարգերը կավերվեն: Այնտեղ առկա է կապար, ցինկ, ոսկի, արծաթ, ծծումբ, երկաթ, մկնդեղ, մոլիբդեն: Կա նաև ցրված ուրան: Այսինքն, հանքավայրի շահագործումը կվնասի հողի պտղաբերությանը, մարդկանց և կենդանիների առողջությանը. հնարավոր է քաղցկեղ, չբերություն և բազմաթիվ այլ հիվանդություններ առաջանան»,-ահազանգում է «Հայաստանի կանաչների միության» նախագահ Հակոբ Սանասարյանը:
Վերջինը տեղեկացրեց, որ «Վայք մետալ» ընկերությունը նույն հանքավայրը շահագործելու ծրագիրը ներկայացրել է Բնապահպանության նախարարությանը, որը բացասական եզրակացություն է տվել, ընկերությունն էլ գործ է հարուցել՝ դատի տալով Էներգետիկայի և բնական պաշարների նախարարությանը և Գլաձորի համայնքապետարանին, որը ևս թույլ չէր տալիս, որ հանքը շահագործվեր: Արդյունքում ընկերությունը դատը շահել է:
Այս որոշմանը դեմ են նաև գյուղացիները, գյուղապետերը: