Արևմտյան Հայաաստանում բնակվող մեր հայրենակիցների երևանյան, ինչպես նաև մարզային այցելությունները շարունակվում են: Դերսիմցիներին այս շաբաթ եկել են փոխարինելու Մուշի, Բիթլիսի, Տիգրանակերտի(Դիարբեքիր) և Մարդինի մեր հայրենակիցները:
Նրանք այցելել են շատ տեսարժան վայրեր, մեծ տպավորություն ստացել:
Միայն մեկ բան չի զարմացրել՝ նմանությունը.
«Նույնն են աչքերը, հայացքը»,-Asekose.am-ի թղթակցի հետ զրույցում անկեղծացան համայնքի ներկայացուցիչները:
Մուշի համայնքի ներկայացուցչի փոխանցմամբ՝ աշխատանքներ են տարվում հայոց լեզվի և պատմության դասավանդման ուղղությամբ։
«Համայնքում պաշտոնապես գրանցվել են 38-ը, բայց գաղտնիք չէ՝ հայերը շատ են: Մեզ հուզում է ամեն ինչ՝ քաղաքականությունը, տնտեսությունը և այլն: Օրինակ ենք ծառայում, որպեսզի այլ համայնքներ էլ ձևավորվեն: Վախ չունենք, թեկուզև մեր քայլերի պատճառով զոհվենք»,-ընդգծեցին նրանք:
Ինչ վերաբերում է հայոց լեզվի և պատմության դասավանդմանը՝ Արևմտահայերի Ազգային կոնգրեսի անդամ Արագած Ախոյանը նկատեց.
«Հայ շատ քաջ կանայք են դիմել մեզ՝ ցանկություն հայտնելով գնալ ու ուսուցանել հայերենը, նրանք ի դեպ, հիմնականում մշեցու արմատներ ունեն, սակայն դեռևս հստակ ծրագիր չունենք: Խնդիր է՝ արևմտահայերեն, թե՞ արևելահայերեն դասավանդել»:
Արագած Ախոյանն անդրադարձավ նաև «Արի տուն» ծրագրին, որի շրջանակներում նույնպես Արևմտյան Հայաստանից գալիս են Հայաստան՝ նշելով, որ նրանց յուրահատուկ, գրագետ մոտեցում է անհրաժեշտ, չէ՞ որ նոր են վերադառնում իրենց հայկական ինքնությանը:
«Նրանք այստեղ ուրիշ կենցաղ, ընտանիքի մոդել են տեսնում, որն իրենց համար խորթ է: Հոգևոր սնունդը պետք է ճիշտ մատուցել»,-նշեց նա:
Անի Կարապետյան