Կենտրոնական Ընտրական Հանձնաժողովի շենքը խայտառակ անմատչելի է. այս մասին նշել է «Ունիսոն» ՀԿ նախագահ Արմեն Ալավերդյանը:
«Շատ ամոթ է, որ շենքն այդ վիճակում է: Այնտեղ բավարար տարածք կա, որպեսզի թեքահարթակ կառուցվի: Այ դրանից հետո հնարավոր կլինի խոսել համագործակցության եւ հավասար մասնակցության մասին»:
Եթե ընտրությունները մատչելի չեն, ապա դրանք արդար համարվել չեն կարող, ասում է Դիսիբիլիթի.ինֆո-ի խմբագիր Մուշեղ Հովսեփյանը:
«Հաշմանդամություն ունեցող մարդը քվեարկելու համար օգնողի անհրաժեշտություն ունենալու դեպքում պետք է ներկայացներ բժշկի թուղթ: Դա աբսուրդային է, մարդը պետք է ունենա օգնողի հնարավորություն եւ այն պետք է ամրագրվի օրենքով»,-ասաց նա:
Խոսելով հաշմանդամություն ունեցող անձանց՝ ընտրվելու իրավունքներից՝ Մուշեղ Հովսեփյանը նշեց. «Կուսակցությունները չեն ներկայացնում հաշմանդամություն ունեցող մարդկանց ձայնը և չեն ապահովում մասնակցությունը: Դա նաև բխում է տեխնիկական խնդիրներից՝ սկսած կուսակցությունների գրասենյակների մատչելիությունից, վերջացրած վերաբերմունքից: Խնդիրն այն է, որ հաշմանդամություն ունեցող անձանց ակտիվ իրավասուբյեկտ չեն դիտարկում: Կուսակցությունները ներառական չեն, նրանք դեռ պատրաստ չեն: Եթե փորձում էլ են հաշմանդամություն ունեցող անձանց ներգրավել, ապա միայն ներգրավում են այն պատճառով, որ անձն ունի հաշմանդամություն. հաշվի չի առնվում փորձն ու քաղաքական հմտությունները: Կան կարծրատիպային մոտեցումներ»:
