«Երեկվա հանդիպումն ընդամենը ձևականություն էր: Հայաստանի և Արբեջանի իշխանությունները հասկանում են, որ պատերազմի շարունակությունն անխուսափելի է: Երկու կողմն էլ տենդագին նախապատրաստվում է ապրիլյան բախման շարունակությանը և այն երկար սպասեցնել չի տա, որովհետև իրենց նպատակին չհասան երկուսն էլ: Ադրբեջանը պլանավորել էր գրավել Մարտակերտը, Աղդամը, Ֆիզուլին, Ջաբրայիլը և այլ տարածքներ, բայց ունեցած մեծ թվով զոհերի հետևանքով աննշան բարձունքներ, դիրքեր գրավեց: Իսկ հայկական կողմը պետք է ջախջախեր թշնամուն և ռազմական գործողությունները տեղափոխեր Ադրբեջանի տարածք՝ ազատագրելով այլ տարածքներ, բայց, սրա փոխարեն, Ադրբեջանի ձեռքում որոշակի հայկական տարածքներ թողեց»,-խոսելով Սանկտ-Պետերբուրգում Հայաստանի, Ռուսաստանի և Ադրբեջանի նախագահների եռակողմ հանդիպման մասին՝ ասաց ադրբեջանագետ Գրիգորի Այվազյանը:
Նրա խոսքով՝ Ադրբեջանը շարունակում է զենք ձեռք բերել և պատահական չէ, որ հանդիպման ժամանակ Ադրբեջանը զորք էր կուտակել Նախիջևանի ու Արցախի սահմանի մոտ.զորավարժություն էր անում.
«Ներգրավված էր շուրջ 25.000 զինվոր, գոյություն ունեցող ամբողջ տեխնիկան: Նրանք դրանով ցույց են տալիս, որ ոչ մի փոխզիջման պատրաստ չեն: Ես նախանձում եմ մեր նախագահի խիզախությանը: Ինչպե՞ս նա կարողացավ Ալիևի արյունոտ ձեռքը սեղմել.մեր անմեղ զինվորների արյունը դեռ չի չորացել: Ես եթե լինեի նրա փոխարեն, մարդասպանի ձեռքը չէի սեղմի»,-նշեց ադրբեջանագետը:
Գրիգորի Այվազյանը նկատում է՝ թշնամին աշխատում է ոչ միայն ռազմական ուժի կուտակման ուղղությամբ, այլ նաև դիվանագիտական դաշտում.
«Նրանց հաջողվեց Հայաստանի ու Ռուսաստանի հարաբերություններում սեպ խրել: Ադրբեջանի քարոզչությունից ելնելով է, որ Ռուսաստանը վերջին շրջանում հայտարարում է, թե Նժդեհը ֆաշիստ է»,-նշեց նա՝ հավելելով.
«Հուսով եմ, որ այս կարճ ժամանակահատվածը, որ տրված է մեզ՝ կկարողանանք պատրաստվել Ադրբեջանի կողմից նոր ռազմական ագրեսիայի, որը կլինի ավելի լայնածավալ: Միևնույն ժամանակ համոզված եմ, որ այդ բախման հետևանքով ադրբեջանական կողմը խայտառակ պարտություն կկրի, կունենա մեծ կորուստներ»:
Անի Կարապետյան
