«Կարող եմ վստահ ասել՝ որևէ մեկը տարածք չի տա, եթե ուզենա էլ՝ չի ստացվի: 3 նախագահներն էլ ասել են, որ պատրաստ են տարածք զիջել կարգավիճակի դիմաց: Դա բանակցային մոտեցում է: Իսկ Ադրբեջանն ասում է՝ այդ տարածքներն իմն են, իսկ կարգավիճակի մասին խոսք չի կարող լինել ու հարցը փակվում է: Հիմա՝ ապրիլյան դեպքերից հետո, Հայաստանն որդեգրել է մի մոտեցում, համաձայն որի բանակցություն չի կարող լինել, մինչև չլինեն մեխանիզմներ, որոնք բացահայտում են, թե որ կողմն է խախտում զինադադարի պայմանագիրը»,-լրագրողների հետ հանդիպման ժամանակ ասաց ՀՀ պաշտպանության նախկին նախարար Վաղարշակ Հարությունյանը՝ հավելելով.
«Մենք միշտ գտնում ենք հակաթույնը, իսկ Ադրբեջանին մնում է շանտաժ անելը: Խախտում է զինադադարը, զոհվում են մեր զինվորները և ցանկությունն է՝ վախ մտցնել հասարակության մեջ, նպաստել արտագաղթին:
Ուստի, մենք պետք է ապահովենք ռազմաքաղաքական բալանսը, ինչի համար պետք է ունենանք տնտեսություն, որը ի վիճակի կլինի ապահովել բանակը ժամանակակից զենքով»:
Անդրադառնալով հաջորդ շաբաթ սպասվող Էդուարդ Նալբանդյան-Էլմար Մամեդյարով հանդիպմանը՝ Վաղարշակ Հարությունյանը նշեց, որ Հայաստանը ամենայն հավանականությամբ կշարունակի կրկին պնդել սահմանին հրադադարի ռեժիմի խախտումները վերահսկող մեխանիզմի ներդրման անհրաժեշտությունը, ադրբեջանական կողմն էլ փորձելու է շրջանցել մեխանիզմների մասին որոշումը և առաջարկելու է բանակցությունների վերսկսում։
«Հայկական կողմը, ենթադրում եմ, հարցը կդնի այսպես՝ սկզբից մեխանիզմների ներդրման հարցը, հետո՝ բանակցություններ»,-նկատեց ՀՀ պաշտպանության նախկին նախարարը:
Անդրադառնալով հարցին՝ Պաշտպանության նախարարությունը պե՞տք է սահմանի վիրավորների ու մահացածների մասին պարբերաբար տեղեկատվություն հրապարակի,-Վաղարշակ Հարությունյանը պատասխանեց.
«Երբ որ մենք խոսում ենք խոսքի ազատության մասին, պետք է միշտ հասկանանք մի բան՝ սա վնասո՞ւմ է գործին, թե՝ ոչ։ Մի կողմից, եթե մահվան դեպքերը թաքցնում են, դա վատ բանի է բերում՝ կա վտանգ, որ սպանությունը կդարձնեն ինքնասպանություն և այլն, մյուս կողմից՝ հեռուստացույցով մահվան դեպքերի մասին անընդհատ տեղեկատվության հաղորդելը բերում է ադրբեջանցիների ցանկալի վիճակին՝ ժողովրդի կողմից հերի՛ք է, ինչքան կարելիին»։
Անի Կարապետյան