«Վրաստանի ազգային արժույթն արժեզրկվել է մոտ 40 տոկոսով: Վերջին շրջանում դա նաև կապված էր հարևան Ադրբեջանի հետ.որոշում էին, թե որքան է մանաթի արժեզրկումն ազդում Վրաստանի վրա»,-այսօր՝ լրագրողների հետ հանդիպման ժամանակ ասաց վրացագետ Ջոնի Մելիքյանը:

Հարևան երկրում իրավիճակը լարված է նաև քաղաքական առումով.

«Վերջին շրջանում ակտիվացել են քաղաքական ուժերը.պատրաստվում են խորհրդարանական ընտրություններին: Այս տարի դրանք կանցնեն 2 ձևով.և՛ մեծամասնական, և՛ համամասնական»:

Շատ ակտիվ են Վրաստան-Իրան հարաբերությունները.

«Այս պահի դրությամբ Վրաստանի փոխվարչապետը գտնվում է Իրանում և բանակցություն է վարում՝ կապված գազի հետ: Նշեմ, որ փետրվարի 15-ից Վրաստանը հանեց վիզայի ռեժիմը: Կարելի է ասել, որ այս տարի մոտ 25.000 զբոսաշրջիկ է այցելել Վրաստան, ինչը գոհացուցիչ չէ, ուստի ցանկանում են կտրուկ ավելացնել նրանց թիվը:  Իսկ, ահա Հայաստանից անցած տարվա տվյալներով ամենաշատն են այցելել Վրաստան.մոտ 1.460.000 մարդ»,-նկատեց վրացագետը:

Անի Կարապետյան