«Սահմանին այսօր այնպիսի իրավիճակ է, ինչպիսին ամեն օր, արտառոց ոչինչ չկա: Սա մեր առօրյան է: Մի օր մի քիչ շատ են խախտում հրադադարը, մի օր` մի քիչ քիչ: Տարօրինակ բան չկա, տարօրինակ կլիներ այն, որ ընդհանրապես չխախտեր հրադադարը: Սա մեր սահմանին տիրող սովորական իրավիճակն է»,-Asekose.am-ին ասաց ԼՂՀ ՊՆ մամլո խոսնակ Դավիթ Բաբայանը` անդրադառնալով այսօր հակառակորդի կողմից հրադադարի խախտմանն ու Թալիշ և Յարըմջա հայկական հենակետերի ինտենսիվ արկակոծմանը:
Դավիթ Բաբայանի խոսքով` Ադրբեջանն իր այս քայլով փորձում է փարատել իր վիրավորված արժանապատվությունը:
«1994 թվականից Ադրբեջանը տարիներ շարունակ ամեն օր պատրաստվում էր ռեվանշի, ապրիլին հարձակում գործեց: Նպատակը մեկն էր`ոչնչացնել Արցախը: Մեր հերոս տղաների և մեր ժողովրդի միասնականության շնորհիվ նրանց չհաջողվեց իրականացնել նպատակը: Ադրբեջանը կրեց մեծ կորուստներ`մարդկային, նյութական: Սա մեծ հարված էր իրենց հասարակությանն ու զինված ուժերի արժանապատվությանը: Հիմա փորձում են փարատել իրենց վիրավորված արժանապատվությունը: Հատկապես երբ տեսան Երևանում կայացած զորահանդեսը, նրանց ևս մեկ անգամ պարզ դարձավ, թե ինչպես կարող է ավարտվել իրենց հերթական արկածախնդրությունը: Ալիևը հասկացավ, որ Բաքվում նստած չի կարող հետևել պատերազմին որպես համակարգչային խաղ»:
Դավիթ Բաբայանը զրույցում նաև նշեց, որ այս պահին, բարեբախտաբար, մենք չունենք վիրավոր զինվորներ:
Հիշեցնենք, որ այսօր մանավորապես` ժամը 12:15-ից սկսած, հակառակորդը 60 և 82 միլիմետրանոց ականանետերից արկակոծում է առաջնագծի հյուսիսարևելյան (Թալիշ և Յարըմջա) ուղղությամբ տեղակայված պաշտպանության բանակի մարտական դիրքերը: Հատկապես ինտենսիվ արկակոծության են ենթարկվում Յարըմջա գյուղի ուղղությամբ տեղակայված մարտական հենակետերը:
Հակառակորդի նահախահարձակ ակտիվությունը ճնշելու համար ՊԲ առաջապահ զորամասերը ձեռնարկում են պատասխան գործողություններ:
Հեղինակ` Ա. Հարությունյան
