ՀՀ կրթության և գիտության նախարարի պաշտոնակատար, «Քաղաքացիական պայմանագիր» կուսակցության վարչության անդամ Արայիկ Հարությունյանն առաջիկա արտահերթ խորհրդարանական ընտրություններին ռեյտինգային ընտրակարգով կառաջադրվի Շենգավիթ և Մալաթիա-Սեբաստիա ընտրատարածքում.այս մասին Արայիկ Հարությունյանը նշեց ՀՀ կառավարության նիստից հետո լրագրողների հետ հանդիպմանը:
«Երբ քարոզարշավի տրամաբանությունը վերջնական որոշենք, այդ ժամանակ մանրամասներ կներկայացնենք: Ազգային ժողովում բյուջեի քննարկումներից հետո առիթ եմ ունեցել անդրադառնալու ռեյտինգայինի թեկնածուների խնդրին, երբ ցուցակի ամբողջական պատկերը կլինի, նոր կքննարկենք»,- ասաց Արայիկ Հարությունյանը:
Լրագրողի այն հարցին, թե պատգամավոր Նահապետ Գևորգյանի որդին կարո՞ղ է լինել ՔՊ-ի ցուցակում, Արայիկ Հարությունյանը նշեց, որ ինքը նման տեղեկություններ չունի: «Նահապետ Գևորգյանն ո՞վ է, ես նման տեղեկություն չունեմ»:
Անդրադառնալով մամուլում տարածված այն տեղեկությանը, թե ՔՊ ցուցակում կլինի նաեւ քրեական հեղինակություն Քանաքեռցի Տույի քույրը, Հարությունյանն արձագանքեց. «Երբ որ դուք մեր ցուցակը տեսնեք՝ այն ձեզ դուր կգա»։
